Apaecieron, según la documentación, nel sieglu XV, los “egiptanos”, creyíase que veníen d’Exiptu y non de la India, que ye’l so orixe. Calcúlase qu’entraron n’España unos 3.000 nómades, al traviés de los Pirineos. Pero dende 1499 foron persiguíos y separtaos de la población poles lleis antixitanes que guetaben la desapaición de la so cultura. De les más de 200, entamaron los Reis Católicos, por obligalos a dexar el nomadismu. En 1539 la pena por nun facelo yera de seyes años de galeres. En 1749 hebo un proyeutu d’estreminiu conocíu como la Gran Redada cola que ficieron 9.000 presos. La so lliberación nun finó hasta 1783. Delles lleis prohibíen l’usu de la so fala caló nel franquismu, güei en peligru de desaniciu. En 1977 ganó el cargu de diputáu’l primer xitanu de la hestoria española.
Foi na Constitución de 1978 na que se reconoció la igualdá llegal de tolos ciudadanos pol Artículu 14. qu’afita la non discriminación por sida de nacencia, raza, sexu, relixón, opinión o cualesquier otra condición personal o social.
N’Asturies hai 10.000 miembros d’esta etnia, principalmente nes ciudaes y nel Nalón. Esta comunidá carez desventaxes sociales pesie a los avances de les caberes trés décades. La so formación ye baxa, asina como alta la so tasa de desemplegu. Queden pocos llugares de chabolismu anque entá nun tán desaniciaos. La probitú algama a más del 80% de los xitanos. Namái’l 17% tien fechos la ESO o estudios superiores énte un 80% de la población xeneral. La fienda de la desigualdá afeuta más a les muyeres. El 66% de les persones xitanes ye menor de trenta años. Y el 63% de los xóvenes ente 16 y 29 años nin estudien, nin trabayen, énte’l 15% la población xeneral.
Amás el pueblu xitanu carez problemes surdíos de la desconocencia y la difícil adaptación a la nueva realidá social. La discriminación ye un pilancu importante haza esti grupu humanu desconocíu ente nós magar de vivir al nuesu llau tantos sieglos. Güei entamen a convivir con normalidá ente la población xeneral, anque arreyen munches rocees de tantu tiempu señalaos negativamente. Los xitanos asturianos ye una minoría étnica que merez respetu, porque son tan asturianos como los demás residentes n’Asturies.
