Axentes medioambientales de la Patrulla Osu d’Asturies alcontraron esta mañana’l cadabre d’una osa espeñada nuna zona de mal accesu nel valle del L.lagu, dientro del Parque Natural de Somiedu.
Les primeres hipótesis apunten a que la osa trató de defender a los sos dos esbardos d’un machu en celu y terminó espeñándose mientres la engarradiella. Los axentes decidieron averándose a la zona en decatándose de que les críes taben soles, ensin la so madre. L’afayu producióse nuna zona d’esclusión del parque, de bien mal accesu y alloñada de les víes de comunicación, lo que complicó considerablemente l’operativu.
Estos fechos nun son escepcionales na dómina de celu, na que s’atoparon otros exemplares espeñaos por causa de les engarradielles ente machos o en produciéndose ataques infanticides que dacuando resulten letales pa estos plantígrados.
Los axentes medioambientales de la Patrulla Osu, en collaboración cola Fundación Oso Pardo, traten agora d’alcontrar a los dos esbardos desaparecíos. El cadabre de la osa yá se treslladó al Centru de Recuperación de la Fauna Montesa de Sobrescobiu, onde se-y va realizar la necropsia.
