La 61ª edición del Festival Internacional de Cine de Xixón, que se celebró del 17 al 25 de payares de 2023, proyectó un total de 191 títulos esibíos en 204 sesiones na ciudá de Xixón y al traviés de la so ufierta de ciclos esclusivos dientro del portal FILMIN. La cifra combinada (presencial + online) d’espectadores + visionados del FICX en 2023 algamó la cifra de 102.298, lo que supón un aumentu de 24.611 en relación a la del pasáu añu. No tocante a la recaldación, el 61 FICX raspió la más alta rexistrada na so hestoria, la correspondiente a la edición de 2019, certificando asina una medría del 22% al respective de la de la 60ª edición.
El FICX confirmó’l so sofitu a cineastes que les sos películes entá nun tienen garantizada la distribución comercial nel nuesu país, que protagonizaron más de la metá de los sos
estrenos n’España (con un 15% de premieres a nivel mundial), completando asina otru de los oxetivos ineludibles del FICX: ser el llugar nel que les distribuidores más ventureres del nuesu país tienen oportunidá d’afayar les xoyes ocultes del cine d’autor ya independiente del añu pal so posterior espardimientu a nivel estatal. A esta apuesta suma la implementación de cuatro premios especialmente destinaos a la distribución.
El númberu de proyectos (co)dirixíos por muyeres premiaos na 61ª edición supón el 53% del palmarés, frutu del compromisu del FICX coles cineastes, que les sos películes constituyeron el 43% de les programaes dientro de les distintes competiciones de la Sección Oficial d’anguaño, y un 52% de la totalidá de la so programación. Nel casu de la clásica sección La Nueche del Curtiu Español, la totalidá d’obres presentaes fueron de realizadores. Coles mesmes, la directora de fotografía francesa Agnès Godard visitó Xixón
pa recibir el Premiu d’Honor 2023 y ser oxetu d’una retrospectiva dedicada a la so
obra (formada puramente por títulos empobinaos por muyeres), a la que se xunió la dedicada a la directora y actriz Elena Martín Gimeno (darréu nomada al Goya a la Meyor
Dirección por Creatura, candidata n’otres trés categoríes) y a la pareya de cineastes compuesta por Christine Molloy & Joe Lawlor.
Tocantes a la valoración de les películes del Festival per parte de los y les espectadores, hasta 16 llargometraxes estrenaos nel FICX llograron una puntuación media cimera a los 8 puntos, y 35 de les obres escoyíes superaron los 7 puntos de valoración per parte del públicu del Festival. Enfants Terribles, sección destinada a alumnáu de primaria y secundaria que cumplió 25 años en 2022, volvió escoyer minuciosamente películes calidables dirixíes a públicu infantil y adolescente, superando nun 12% los datos del públicu del añu pasáu nes sos proyecciones. Esto demuestra que, a pesar de cumplir 61 años, el FICX sigue atrayendo a nuevu públicu nuevu, tantu a les proyecciones y alcuentros col públicu del Festival, como a les xornaes de FICXPro y al llaboratoriu audiovisual SEMILLERU.
