Política de privacidá

Esta páxina cuenta qué se fai colos datos de quien llee Xixón al Día. Ta escrita pa entendese, y diz lo qu’esti sitiu fai de verdá, non lo que fai una web cualquiera.

Lo primero, en dos renglones: el periódicu lléese ensin aceptar nada y ensin dexar nome nin corréu. Nun hai publicidá a la midida, nin perfiles de llectores, nin servicios de marketing. Mídense dos coses: cuántes vegaes se llee cada artículu, que lo cuenta’l propiu sitiu ensin cookies y ensin guardar la to direición IP, y, namás si lo aceptes, cuánta xente llee cada páxina.

Quién ye’l responsable

• Responsable: CUATRO GOTES PRODUCCIONES SL (NIF B52553070)
• Direición: Cai Emilio Tuya, 51, 33203 Xixón — Asturies
• Corréu: hola@cuatrogotes.com
• Sitiu web: xixonaldia.com

Los datos trátense d’alcuerdu col Reglamentu (UE) 2016/679 (RXPD) y cola Llei Orgánica 3/2018, de 5 d’avientu (LOPDGDD).

Qué se trata, pa qué y con qué base llegal

1. Lleer el periódicu

Pa sirvite una páxina, el servidor apunta nel so rexistru d’actividá la direición IP, la fecha, la páxina pidida y el restolador. Ye lo que fai cualquier servidor web y sirve namás pa que’l sitiu funcione, pa protexelu d’ataques y pa recuentos téunicos.

Base llegal: l’interés llexítimu del responsable en caltener la seguranza y el funcionamientu del sitiu (art. 6.1.f RXPD). Esos rexistros caltiénense’l tiempu curtiu que fai falta pa eso y depués desanícense.

2. Cuántes vegaes se llee cada artículu

La llista «Lo más lleíu» que sal al llau de cada artículu fáila’l propiu sitiu: cuenta cuántes vegaes se llee cada artículu. Cuando abres ún, el to restolador manda-y al nuesu servidor el númberu d’esi artículu, y el servidor suma una llectura a la cuenta d’esi día.

Nun se guarda nada más: nin la to direición IP, nin el restolador, nin nengún identificador, nin cookies, nin nada nel to preséu. Lo que queda ye un día, un artículu y un númberu, y con eso nun hai manera de saber quién lleyó qué. Nun intervién nengún terceru: esa petición va namás al nuesu servidor.

Base llegal: nun fai falta, porque lo que se guarda nun ye un datu personal: nun identifica a naide. La petición en sí pasa pol rexistru del servidor, como cualquier otra, y tien el tratamientu del puntu 1. Y como nun se guarda nin se llee nada nel to preséu, nun pasa pol avisu de cookies: nun hai nada qu’aceptar.

3. La to decisión sobro les cookies

Cuando escueyes qué aceptes y qué refugues, esa decisión hai que guardala: si non, habría que preguntátelo en cada páxina. Guárdase nel to preséu una cookie propia y un rexistru nel nuesu servidor con un númberu dau al debalu, la fecha, la versión del avisu y qué escoyisti.

Nesi rexistru nun se guarda la to direición IP. Ye una opción que se pue prender y ta apagada a costafecha.

Base llegal: el cumplimientu de la obligación llegal de poder demostrar el consentimientu (art. 6.1.c RXPD y art. 7.1 RXPD). La cookie dura un añu y la eleición vuelve preguntase a los cuatro meses; pues camudala cuando quieras dende «Camudar los axustes de privacidá».

4. Saber cuánta xente llee’l periódicu

Namás si aceptes «Estadístiques». Úsase Google Analytics 4 pa saber cuántes visites tien cada páxina, d’ónde vienen y qué se llee. Sirve pa decidir qué se cuenta y cómo, y nun s’usa pa publicidá nin pa identificar a naide.

• Quién lo presta: Google Ireland Limited.
• Qué se trata: un identificador seudónimu guardáu nes cookies _ga y _ga_K5Y0QC64W2, datos téunicos del restolador y del preséu, les páxines que se visiten y l’orixe averáu de la visita.
• La direición IP: úsase nel momentu de la recoyida pa saber la zona xeográfica averada y descártase enantes de rexistrase. La midida va configurada con anonymize_ip.
• Ónde: Irlanda y Estaos Xuníos. Google Ireland Limited ta autocertificada nel Marcu de Privacidá de Datos UE-EE.XX.
• Cuánto duren les cookies: dos años, y desanícense si retires el consentimientu.
• Nun tán activaes nin Google Signals, nin la personalización publicitaria, nin los datos apurríos pol usuariu.

Base llegal: el to consentimientu (art. 6.1.a RXPD). Pues retiralu cuando quieras y nun pasa nada: el periódicu lléese igual.

5. El conteníu d’otres webs que va dientro d’un artículu

Dalgunes noticies lleven un vídeu, un mensaxe d’una rede social, un gráficu o un cortu d’audio que nun ta nel nuesu servidor. Esi conteníu queda bloquiáu hasta que lu aceptes: mientres tanto nun se-y pide nada a esa empresa y nun se-y da nengún datu de to. Al aceptalu, esi serviciu recibe la to direición IP y pue poner les sos propies cookies.

Serviciu	Quién lu presta	Ónde se traten los datos	Garantía si sal de la UE
YouTube	Google Ireland Limited	Irlanda y Estaos Xuníos	Marcu de Privacidá de Datos UE-EE.XX.
X (enantes Twitter)	Twitter International Unlimited Company	Irlanda y Estaos Xuníos	Cláusules contractuales tipu
Facebook	Meta Platforms Ireland Limited	Irlanda y Estaos Xuníos	Marcu de Privacidá de Datos UE-EE.XX.
Datawrapper	Datawrapper GmbH	Alemaña	Nun sal de la UE
Reproductor de la Cadena SER	Sociedad Española de Radiodifusión, S.L.	España	Nun sal de la UE

Base llegal: el to consentimientu (art. 6.1.a RXPD), serviciu a serviciu. Cada un pues aceptalu o refugalu por separao dende «Camudar los axustes de privacidá», y tienes el detalle de les sos cookies na política de cookies.

6. Si nos escribes

Si mandes un corréu a la redaición o a l’alministración, tratamos la to direición y lo que cuentes namás pa contestate y pa poder responder de lo que se publique. Nun se-yos da a naide más y nun s’usa pa mandate publicidá.

Base llegal: l’interés llexítimu n’atender a quien mos escribe (art. 6.1.f RXPD) y, cuando lo que nos mandes seya pa publicar, el to consentimientu. Caltiénense el tiempu que faiga falta p’atendete y, dempués, mientres puea haber responsabilidá pola información publicada.

7. Si dexes un comentariu

Nes poques noticies que tienen los comentarios abiertos, WordPress guarda’l nome, el corréu y el testu que dexes, xunto cola direición IP dende la que s’escribió, pa poder moderalu y pa evitar el corréu puxarra. El comentariu apaez cola firma que pongas.

Base llegal: el to consentimientu al mandalu (art. 6.1.a RXPD). Pues pidinos que lu desaniciemos cuando quieras.

Lo que NON facemos

• Nun hai cookies de marketing nin de publicidá a la midida. El grupu ta vacíu a costafecha y por eso nin apaez nel avisu.
• Nun se vienden nin se ceden los datos a naide.
• Nun hai boletín, nin rexistru de llectores, nin cuenta que crear: la web nun dexa rexistrase.
• Nun se toma nenguna decisión automatizada sobro ti, nin se fai perfil dalu.
• Respétase «Do Not Track». Si el to restolador manda esi avisu, nun se-y da la llata col avisu de cookies y nun se carga nengún serviciu opcional.

A quién se-yos dan los datos

Fuera de los servicios que se citen arriba —y namás cuando los aceptes—, nun ta prevista nenguna comunicación de datos a terceros, sacantes la que fuere obligatoria por llei. Como cualquier web, el sitiu ta alcontráu nun proveedor d’alcuellu, qu’actúa como encargáu del tratamientu col contratu qu’esixe la normativa.

Cuánto tiempu se caltienen

• Rexistros del servidor: el tiempu curtiu que fai falta pa la seguranza.
• Les llectures de «Lo más lleíu»: un númberu por día y artículu, que nun identifica a naide. Caltiénense como estadística del periódicu; la llista namás mira los siete caberos díes.
• La to decisión sobro les cookies: la cookie dura un añu; el rexistru del consentimientu caltiénse mientres seya necesario pa poder demostralu.
• Estadístiques: les cookies duren dos años; los datos de la midida caltiénense nos sistemes de Google según los plazos de retención configuraos.
• Correos y comentarios: el tiempu que faiga falta pa lo que se dixo enriba.

Los tos drechos

Tienes drechu a:

• Retirar el consentimientu en cualquier momentu, ensin que eso afeute a lo que se fixere enantes.
• Acceder a los tos datos, rectificalos, desanicialos, llendar o oponete al so tratamientu y a la portabilidá.
• Reclamar énte l’Axencia Española de Protección de Datos (www.aepd.es) si consideres que nun se ta faciendo bien.

Pa exercelos, escribi a hola@cuatrogotes.com o a CUATRO GOTES PRODUCCIONES SL, cai Emilio Tuya, 51, 33203 Xixón — Asturies, diciendo qué drechu quies exercer.

Y pa lo de les cookies, nun fai falta escribir a naide: pues camudar los axustes, ver l’historial de los tos consentimientos o retirar el consentimientu equí mesmo.

Menores

Esti sitiu ye un periódicu d’accesu llibre y nun ta dirixíu especialmente a menores nin recueye datos d’ellos a costafecha. Pa dar el consentimientu de los servicios opcionales hai que tener catorce años cumplíos.

Seguranza

El responsable aplica les midíes téuniques y organizatives afayadices pa protexer los datos, y trátalos de mou llícitu, lleal y tresparente, llendándose a lo necesario pa los fines que s’esplican equí.

Cambios nesta política

Si camuda daqué de lo que se cuenta equí —un serviciu nuevu, una midida que se quita— esta páxina anóvase y la fecha del cambiu apaez al pie. Si el cambiu afeuta a daqué qu’aceptasti, va volver preguntásete.

Anováu'l 11.09.2026