15 conciertos esti mes pa enllenar de música’l Principáu con Asturies, Cultura en Rede
El circuitu de música d’Asturies, Cultura en Rede ufierta 15 conciertos pa tolos gustos en tol territoriu asturianu esti mes d’avientu.
Esti vienres Pablo Moro & Los chicos listos van actuar en Grau; Marco Martínez va presentar Noi, el so últimu trabayu surdíu del jazz, en Siero; y el sábadu, va haber una selección de folk norteamericanu con Hoot´n´holler en Valdés.
El grupu de música Concerto, en formatu cuartetu de cuerda y sopranu, va tar el 5 d’avientu en Cangas del Narcea; Forma Antiqva y la so Sonatine Private, el día 8 en Cangas del Narcea; y B´Rocko Project, col so programa de música clásica Las pequeñas sinfonías, el 9 d’avientu en Ribadeva. El día 10 Thash-Tornados va llevar a Villaviciosa’l so espectáculu AcartOOnados, onde combina soníos del swing, jazz y rock and roll con dibuxos animaos.
El 17 d’avientu va haber conciertos de Celso Díaz Band en Siero y de Berto Varillas & Asturiana Mining Company en Salas, y el día 23 el pianista César Latorre va poner música a películes mudes en Gozón y Algaire va tocar en Grau.
Los soníos del órganu y del saxofón van xuntase en Nova et Vetera, de l’Asociación Música Nostra, el día 26 en Sotu’l Barcu; Alicia Álvarez va interpretar Canciones pa neñes y neños, del so álbum Kikirikikí, el 28 d’avientu en Llaviana; Cristina Montull Trío va actuar en Llanes el día 29 y Buen Suceso va poner el ramu a la programación del circuitu de música’l 30 d’avientu en Navia.
Nel últimu semestre del añu programáronse nel marcu d’esti circuitu 78 conciertos de 36 profesionales y empreses en 36 conceyos, con un presupuestu superior a los 185.000 euros.
Los circuitos d’Asturies, Cultura en Rede son un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies. Amás del circuitu de música, hai circuitos temáticos de cultura tradicional, Xacobéu, artes escéniques, artes visuales, Autores nel Camín, lliteratura y Cuadonga 2022-Camín de los Santuarios.
