El presidente d’Asturies, Adrián Barbón, y el conseyeru de Ciencia, Borja Sánchez, recibieron ayeri a los trabayadores de Mina Miura y a la so representación sindical nun alcuentru nel que’l gobiernu autonómicu anunció la so voluntá d’esplorar una solución xurídica que dexe desbloquiar la so situación. Sánchez treslladó que l’Executivu quier dar una respuesta axil a un escenariu “inxustu” pa los trabayadores y la contorna. “Somos un gobiernu mui sensible colo que ta pasando nel suroccidente asturianu y consideramos que la transición enerxética nun foi tolo xusta qu’habría ser”, afirmó.
Los trabayadores de Mina Miura remataron una marcha a pie dende Ibias a Uviéu pa denunciar la so situación llaboral. Va meses que nun perciben les nómines que-yos correspuenden y l’empresa permanez paralizada. Al términu de la movilización axuntáronse col presidente y el Conseyeru de Ciencia. Al términu, el conseyeru esplicó qu’una de les principales llinies de trabayu del gobiernu pasa por estudiar l’encaxe llegal pa promover la caducidá de l’actual concesión. “Lo que tamos mirando ye cómo podemos facer caducar la concesión que tien agora mesmo esta empresa pa que pueda volver salir a concursu y que, nun escenariu óptimu, heba una empresa solvente, tanto técnica como financieramente. que pueda facese cargu del xacimientu”, señaló. Sánchez aportunó en que “tolos pasos que deamos tienen que tener encaxe llegal y xurídicu”, sorrayando la importancia de garantizar seguridá tanto pa los trabayadores como pa posibles empreses interesaes.
El gobiernu defendió la viabilidá del xacimientu por tratase d’un recursu estratéxicu. “Tamos falando d’un mineral que ta incluyíu na llista de materies crítiques de la Unión Europea, un carbón coquizable pa siderurxa, que pue xenerar riqueza y emplegu nel occidente asturianu”, destacó’l conseyeru. Nesti sentíu, remarcó la voluntá del Executivu d’avanzar “d’una forma decidida” na busca de soluciones.
Al respective de los plazos, una de les principales esmoliciones de la plantiya, Sánchez afirmó: “vamos tratar de ser lo más áxiles posible; ye una tema que yá llevamos tiempu estudiando”. El conseyeru treslladó a los trabayadores que se caltienen abiertes distintes llinies de trabayu y que l’Executivu va siguir en contactu permanente cola representación social pa informar de les meyores.
