La nueva programación de la Universidá Popular de Xixón presenta una ufierta de 153 cursos y talleres. Nesta edición va haber una trentena de nuevos cursos, nel intentu que vien siendo habitual de revisión y adaptación a nueves realidaes de la programación. Hai que destacar dalgunos como’l dedicáu al compositor, director y pianista alemán Ludwig van Beethoven como conmemoración de los 250 años de la so nacencia; o los itinerarios arqueolóxicos diseñaos en collaboración colos Museos Arqueolóxicos de Xixón.
Pero nun son estes les úniques novedaes, tamién entren nel programa les muyeres creadores del arte asturiano, la fotografía caleyera o la marroquinería con retales. Pataques y güevos de mil maneres, los xuegos de mesa, el fascinante mundu de los insectos, una iniciación al periodismu o la escritura medieval, son otros de los conteníos novedosos.
El catálogu de conteníos y oxetivos propuestos pa caún de los cursos ta yá disponible na páxina web del Conceyu. La información tamién esclaria si ye precisu tener conocencies previes, apurrir dalgún material o otres indicaciones previes que ye importante conocer antes del empiezu de matrícula, el martes 21 de xineru.
