El Gobiernu d’Asturies autorizó güei un gastu de 5,6 millones pa la convocatoria 2023-2024 del Programa Xóven Ocúpate, de sofitu al insertamientu llaboral de persones desemplegaes menores de 30 años y ensin formación académica. El Serviciu Públicu d’Empléu (Sepepa) va encargase de xestionar esti presupuestu, el más eleváu desque se punxo en marcha esta iniciativa.
Entidaes locales y organizaciones ensin ánimu d’arriquecimientu imparten esti programa, que consiste nun períodu de nueve meses de formación teórica combinada con práctiques, con cuenta de les persones participantes llogren certificaos de profesionalidá de nivel 1, de cara a facilitar la so incorporación al mercáu llaboral y fomentar una actitú proactiva pa favorecer la so empleabilidá.
Esti proyectu diríxese a mozos de 16 a 30 años incluyíos nel Ficheru Nacional de Garantía Xuvenil y tien especial importancia porque sofita a persones ensin estudios o qu’abandonaron la formación académica de manera temprana. Poro, trátase d’un colectivu con dificultaes añedíes d’insertamientu nel mercáu de trabayu a quien esta iniciativa ufierta una oportunidá pa formase y llograr una titulación.
Nel periodu 2019-2023, el Sepepa destinó a esti programa 15,22 millones n’ayudes a les corporaciones locales y entidaes ensin ánimu d’arriquecimientu participantes. Nes distintes ediciones ufiertóse sofitu a 1.270 mozos desemplegaos.
