El Festival Internacional de Cine de Xixón, esi eventu qu’enllena cada mes de payares les sales de cine de Xixón y que programa mientres tol añu delles actividaes cumple esti añu el so 60 aniversariu dende la so nacencia un 21 de xunetu del añu 1963. 60 años dempués, ye un referente cultural de la ciudá y del estáu y esti añu va cellebrar la so 61 edición.
Surdió a iniciativa de Isaac del Rivero , dibuxante y publicista, quien lo dirixió mientres les sos primeres 19 ediciones, presentando la so dimisión n’avientu de 1981. El primer añu nel que se celebró recibió’l nome de Certame Internacional de Cine y TV Infantil. Ente 1964 y 1968 caltuvo’l mesmu nome, anque camudando la parte final «infantil» por «pa neños». Ente 1969 y 1976 la TV dexó d’apaecer nel nome oficial del certame. A partir de 1977 y hasta 1987 (con pequeñes variantes en 1984, 1986 y 1987) utilizó’l nome de Certame Internacional de Cine pa la Infancia y la Mocedá.
Anque yá en 1986 empezó a anteponer a esti nome’l de Festival Internacional de Cine de Xixón, esti nome nun va quedar como l’únicu hasta la edición del añu 1988. Los sos oríxenes como festival pa la infancia y la mocedá, primero del mundu nesta especialidá, espliquen l’especial interés qu’esti festival emprestó siempres al público más mozo. Poro, tolos años hai un xuráu compuestu por mozos y moces d’ente 17 y 25 años, que s’escueye ente aquellos que lo soliciten.
A lo llargo de los últimos años pasaron pol Festival de Xixón dalgunos de los más prestixosos profesionales del cine independiente a nivel mundial. Visitaron esti festival, ente otros, Darren Aronofsky Abbas Kiarostami, Aki Kaurismäki, Todd Haynes, Pedro Costa, Paul Schrader, Joao Cesar Monteiro, Seijun Suzuki, Jem Cohen, Kenneth Anger, Ulrich Seidl, Hal Hartley, Lukas Moodysson, Tsai Ming-liang, Claire Denis, Todd Solondz, Bertrand Bonello, Apichatpong Weerasethakul, Monte Hellman, Ruben Östlund, Philippe Garrel, Lisandro Alonso, John Carroll Lynch, Whit Stillman, Víctor Erice, José Luis Cuerda, Tizza Covi y Rainer Frimmel, Isabel Coixet o Carla Simón.
