Asturies atropa 18 meses consecutivos d’amenorgamientu del desempléu interañal. En septiembre había na rexón 61.789 persones inscrites como demandantes nes oficines del Serviciu Públicu d’Empléu (Sepepa), lo que supón 2.419 persones menos que nel mesmu mes del añu pasáu (-3,77%).

En términos interañales, el paru baxó n’Asturies en tolos sectores d’actividá a esceición del colectivu ensin empléu anterior, qu’aumentó llevemente. Destaquen los descensos nes actividaes del sector servicios (1.827 paraos menos o -3,85%), na industria (271 paraos menos o -5,79%) y na construcción (275 paraos menos o -5,64%).

Tocantes a la evolución del desempléu intermensual, respectu al mes d’agostu, aumentó en 2.565 persones (+4,33%), en bona midida pola finalización de los contratos venceyaos a la temporada turística, la meyor de la serie histórica tanto en turistes como en visitantes. Ello ye que más d’ocho de cada diez nuevos paraos inscritos en septiembre son persones trabayadores del sector servicios.

Según datos del Sepepa, los conceyos más turísticos lideraron en términos porcentuales les xubíes del paru en septiembre, con tases bien cimeres a la media rexonal: Cangues d’Onís (+22.14%); Colunga (+22,34%); Llanes (+22,80%); Valdés (+15,04%); Onís (+40,91%); Parres (+20,50%); Ribadeva (+41,30) y Ribeseya (+34,04%). Otra manera, n’Uviéu, Xixón y Avilés los aumentos fueron llixeramente inferiores al promediu.

A pesar d’esta xubida, la contratación caltien la so fortaleza n’Asturies, especialmente la de calter indefiníu. Asina, en septiembre rexistráronse 24.044 contratos, 893 más que n’agostu (+3,86%). D’ellos, 9.104 fueron contratos fixos, suponer 2.068 más que’l mes anterior (+29,39%). Esto supon que casi cuatro de cada diez contratos suscritos n’Asturies son indefiníos cuando va un añu apenes llegaben al 8%.

Acordies colos datos del Ministeriu de Trabayu y Economía Social dende xineru suscribiéronse n’Asturies un total de 67.592 contratos fixos, el 30,59% de tolos allugamientos rexistraos na rexón, que suman 220.948.