Per sestu añu consecutivu, el Festival Internacional de Cine de Xixón (FICX) va poder esfrutase tamién n’Avilés. El Centru Niemeyer acueye ente los díes 24 y 26 de payares cinco de los títulos que van poder vese nesta 59ª edición de la cita xixonesa. Dende güei pueden mercase les entraes pa les películes Inside the Uffizi, el miércoles 24 a les 20:00; Destello Bravío, el xueves 25 a les 18:00, El Planeta, el xueves 25 a les 20:00; Ninjababy el vienres 26 a les 18:00 y Moneyboys, el vienres 26 a les 20:00.
Inside the Uffizi ye un documental alemán nel que se nos fala de la galería conocida pola colección d’arte más importante del mundu, guiaos pola pasión que supón conocer un sitiu d’estes característiques.
El cine español tamién tien presencia, con Destello bravío, un llargometraxe d’Ainhoa Rodríguez nel que se traten temes como la vida rural, la soledá y la despoblación de los pueblos.
El cine d’Asturies ye otra de les xeres que van poder vese, con El Planeta, de la cineasta Amelia Ulman. Esta película rodóse en Xixón y presenta a dos muyeres al borde del deshauciu que traten d’estafar a la xente pa vivir penriba de les sos posibilidaes.
Dende Noruega llega Ninjababy. Cuando Rakel descubre que ta embarazada tres un llíu d’una nueche, la so vida cambia. Nun ta preparada pa ser madre, pero’l so mozu quier tenelo. Nesi intre, apaez un personaxe animáu, Ninjababy, que convierte la vida de Rakel nun infiernu.
El FICX remata nel Centru Niemeyer cola coproducción d’Austria, Francia, Taiwán y Bélxica titulada Moneyboys, na que un mozu d’una pequeña aldea rural aprende a ser un astutu y profesional na gran ciudá embaxo la tutela del so amante, Xiaolai. Sicasí, la policía ta tres d’él y torna a la aldea, onde rechacen la so homosexualidá. Nesti intre, el protagonista tien que volver a la gran ciudá, pero esta vegada cola ayuda del so amigu de la infancia.
Les entraes pueden mercase dende güei al preciu de 5€ per proyección. Los socios del Club Cultura van poder mercales con un descuentu de 2€ per entrada. Toles pelicules van ser en versión orixinal sotitulada al español.
