El Gobiernu d’Asturies dio güei un nuevu impulsu a la I+D+i cola aprobación de 7,5 millones n’ayudes para proyectos d’investigación n’empreses y para la creación y afitamientu de compañíes emerxentes de base tecnolóxica. Trátase d’un apueste pa incentivar la inversión del sector priváu nel ámbitu de la innovación y ameyorar la competitividá empresarial.

El Conseyu de Gobiernu autorizó’l gastu para financiar dos llínees de convocatories promovidas pola Conseyería de Ciencia, Innovación y Universidá y xestionaes pol Institutu de Desenvolvimientu Económicu del Principáu (Idepa). Tratar de les siguientes:

Ayudes a proyectos I+D+i empresarial

La convocatoria va cuntar con 6 millones en sovenciones pa proyectos venceyaos a la Estratexa d’Especialización Intelixente. L’oxetivu ye contribuyir a la meyora de la competitividá. Los proyectos tendrán d’enmarcase na investigación industrial o’l desenvolvimientu esperimental y pueden ser realizaos pola mesma empresa o subcontrataos a un provisor esternu d’I+D.

Ente 2019 y 2021, el Principáu atendió 342 solicitúes d’empreses y destinó 19 millones a financiar esti tipu d’iniciatives.

Los proyectos d’I+D empresarial consiguieron movilizar una inversión por valor de 51,4 millones; esto ye, cada euru públicu xeneró un gastu de 2,7 euros privaos. Solo na convocatoria del pasáu añu aprobáronse 110 proyectos d’un centenar d’empreses, más de la metá en collaboración con centros d’investigación.

Ayudes a les empreses de base tecnolóxica

Esta llinia, dotada con 1,5 millones, pretende favorecer ya impulsar el desenvolvimientu d’un tipu d’empresa que la so actividá se centra na esplotación de productos o servicios col usu de tecnoloxíes o conocencies desenvueltes a partir de l’actividá investigadora. Son, por tanto, firmes bien innovadores y dinámiques. En 2021 aprobáronse 18 proyectos de compañíes d’estes característiques que movilizaron xuna inversión de 2,1 millones.

Per otra parte, el Conseyu de Gobiernu tamién dio’l vistu bonu al protocolu que se va roblar col Ministeriu de Ciencia ya Innovación y les comunidaes de Galicia, Andalucía, Canaries, Estremadura y Baleares pa impulsar un programa d’I+D+I nel marcu del Plan Complementariu na Área de Biodiversidá, con cargu a los fondos del Mecanismu de Recuperación y Resiliencia.