Tres el reciente ésitu de les visites guiaes de Xixón Tours mientres la pasada Selmana Santa, tenemos yá nueves feches y rutes coles que conocer la villa de Xixón dende un puntu de vista más fonderu y, sobremanera, diferente.  Una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu que lleva yá dellos años en funcionamientu. Nesta ocasión, van ofrecese dos rutes:

 

El Xixón más criminal – Vienres 6 de mayu (De 20:30 a 22:00)

Trátase d’una ruta na que vamos conocer dalgunos de los crímenes más ablucantes qu’asocedieren en Xixón. Dende xente que la so razón pa facer el crime nun yera más que la maldá pura, hasta aquellos bandoleros pa los que’l so crime ye una marca de rebeldía y anarquismu pol que llegaron hasta namorar a munches moces, pasando inclusive per aquellos golfos qu’acaben dando hasta pena magar de l’atrocidá del crime. Un camín pel Xixón más criminal que saldrá de la Plaza del seis d’agostu, hasta acabar na cai Institutu, pasando per sitios emblemáticos de Xixón como la Cai Corrida o la Plaza’l Parchís

 

Xixón y les traxedies de la mar – Sábadu 7 de mayu (De 19:30 a 21:00)

Nesta ruta, los visitante esfrutarán d’un percorríu peles traxedies más desconocíes que vivió la ciudá de Xixón mientres la última metá del sieglu XIX y la primera del XX. Una ruta que va llevamos dende’l Muséu del Ferrocarril, hasta’l Campu Valdés, pasando pela Antigua Rula, na que vamos conocer casos de naufraxos mientres la Primer Guerra Mundial, les lleendes del Reina Regente, xoya de la marina española y hasta barcos pantasma, como ye’l casu del Mary Celeste, un barcu qu’inicia les lleendes y cuentos de barcos pantasma que dempués apaecen nel cine.

 

Dambes rutes, ofrecíes n’asturianu, tán diseñaes y sedrán guiaes pola hestoriadora, arqueóloga y presentadora del programa Historias y misterios de TPA y de Sentir Asturies (RPA) Arantza Margolles. 

 

TARIFES:

  • Mayores de 18 años: 10€
  • Menores (de 13 a 18 años): 8€
  • Reciella (de 0 a 12 años): de baldre

*El pagu va realizase minutos enantes d’entamar el tour.

La reserva pue facese rellenando’l formulariu d’esti enllaz: https://forms.gle/A9SWEKdnSvnLTzew9