El voceru municipal d’IX-Más País-IAS nel Conceyu de Xixón, Javier Suárez Llana, pidió esta mañana al gobiernu local “un esfuerzu por ampliar la mirada y nun amenorgar la política cultural pa los próximos años a dos únicos equipamientos”, en referencia a los proyectos anunciaos pa Tabacalera y el Palaciu de Revillaxixéu.
“Creemos que definir usos de manera aisllada pa nuevos equipamientos, ensin tener en
cuenta los que yá esisten y les necesidaes que tienen, ye un erru”. Nesti sen, Suárez Llana considera necesaria la ellaboración d’un plan “pa reordenar el conxuntu d’equipamientos culturales de la ciudá”, de manera que tanto la rede museística como los espacios de creación y exhibición “guarden una coherencia, establezan sinerxies, programen d’una manera coordinada y complementaria y dean tamién respuesta a les necesidaes del sector creativo y cultural de la ciudá”.
El voceru d’IX cree que “ye nesti marcu nel que tienen d’encetase los usos pa nuevos equipamientos como Tabacalera, el Palaciu de Revillaxixéu o les recien restauraes bateríes del Cerru de Santa Catalina”, proyectos como los anunciaos pol gobiernu pa los antiguos depósitos d’agua en Roces y el Palaciu de San Andrés de Curniana en Contrueces, o les necesidaes que tienen equipamientos como la Casa Natal de Xovellanos, “que va años que quedó ensin espaciu pa esibir más colección y ye amás un edificiu ensin accesibilidá”.
“Ye una bona noticia que’l gobiernu tenga idees y plantegue proyectos en materia cultural, pero creemos que ye necesariu un enfoque de conxuntu y abiertu a la participación vecinal y del sector cultural y creativu”, esplicó Suárez Llana, qu’anunció que “por eso, vamos solicitar una comparecencia de la conceyala de Cultura, Mocedá y Museos nel Plenu de setiembre, pa qu’esponga de forma detallada los proyectos nos que trabaya la so conceyalía, y vamos pidir tamién que tresllade esi alderique a la primer xunta del Conseyu Sectorial de Cultura”.
Tocantes a los usos anunciaos pa Tabacalera y el Palaciu de Revillaxixéu, el voceru d’IX refuga l’usu hosteleru pa l’antigua fábrica de tabacos de Cimavilla y pide apostar por usos que contribuyan a xenerar actividá económica y empléu nel sector creativu y cultural, “y nun amenorgar la cultura a una política de promoción turística”.
Amás, Suárez Llana señala como prioridá pal Palaciu de Revillaxixéu que la Fundación Bancaria Cajastur “esiba nél la colección de belles artes qu’atesora y que forma parte del
patrimoniu de tolos asturianos”, amás de la xestión per parte del Conceyu d’amestar Colexata de San Xuan Bautista, “un espaciu singular y polivalente que n’ausencia d’un salón d’actos na zona centro podría allugar programación tanto del propiu Conceyu como d’asociaciones, entidaes, ceadores, artistes y otros axentes culturales de la ciudá”.
