El Centru de Recepción ya Interpretación del Prerrománicu Asturianu abre al públicu la esposición Testamentum, que’l so exe principal ye’l Liber Testamentorum o Llibros de los Testamentos, el códice más importante del archivu capitular de la Catedral de San Salvador y unu de los más bellos exemplos de llibros miniaos del sieglu XII.
Esta mañana’l director xeneral de Patrimoniu Cultural, Pablo León, visitó esta amuesa qu’inclúi facsímiles, imaxes y paneles esplicativos nos que se repasa la hestoria d’esti llibru, mandáu componer pol obispu Pelayo col enfotu de recoyer les donaciones feches a la ilesia de San Salvador na Alta Edá Media. La serie de documentos copiaos abarca dende l’añu 812 hasta 1118 y tán ornaos con miniatures nes qu’apaecen reis, obispos y pontífices que favorecieron esta Ilesia.
Na so visita, el director xeneral tuvo acompañáu por Rubén Domínguez, comisariu de la esposición xunto con Celia Argüelles Quirós, Deva Álvarez Argüelles y Isaac Cuello Rey; Andrés Antón Díez, presidente de l’Asociación Asturies Caligrafía; Joaquín Lorences, presidente de la Fundación Valdés-Salas; y por Lorenzo Arias, doctor en d’Hestoria del Arte pola Universidá d’Uviéu y especialista nel Arte Prerrománico Asturianu.
El públicu que visite esta amuesa tamién puede conocer el métodu emplegáu pa la creación de los pergaminos y otros códices españoles como la Biblia de Danila, Los beatos o’l Testamentu d’Alfonso II y reparar el material un scriptorium, l’espaciu dientro de los conventos destináu a la copia de manuscritos per parte de los monxos mientres la Edá Media.
Los 15 paneles de la esposición, vencíos pel Centru d’Estudios de l’Alfoz de Gauzón, fueron ellaboraos pol alumnáu del Grau d’Hestoria del Arte de la Universidá d’Uviéu/Uviéu. L’amuesa tamién cunta cola collaboración de la Fundación Valdés-Salas, que cedió’l facsímil del Liber Testamentorum, y d’Andrés Antón Díez, calígrafu y presidente d’Asturies Caligrafía.
Antón Diez participa nesta amuesa con delles obres orixinales feches por él mesmu. Trátase de la reproducción del foliu 0v del Liber Testamentorum y tamién reprodució de la Biblia de Danila dos lletres capitulares (foliu 186v y 189r) y la reproducción del foliu IV. Tou ello en pergamín y colos mesmos pigmentos y técniques que los orixinales. L’espertu calígrafu cedió, amás, el material de scriptorium medieval que s’esibe nuna de les vitrines.
La esposición, con entrada gratuita, podrá visitase hasta’l 17 d’avientu, de miércoles a domingu, nel horariu d’apertura del Centru.
