El tresporte públicu sigui ganando viaxeros n’Asturies gracies al impulsu de CONECTA, la tarifa que llanzó’l gobiernu pa movese per Asturies por un máximu de 30 euros al mes. Los datos provisionales del Consorciu de Tresportes d’Asturies (CTA) reflexen que nel primer cuatrimestre’l númberu de persones usuaries aumentó un 17,2% en comparanza col mesmu períodu de 2024. En total, de xineru a abril les llinies de CTA tuvieron 11.166.319 usuarios y rexistraron 1.641.349 validaciones más que nes mesmes feches de 2024.
L’apueste del Gobiernu d’Asturies por fomentar una movilidá sostenible al traviés del tresporte públicu llogra un claru respaldu ciudadanu. N’abril, 2.786.985 viaxeros utilizaron los servicios del CTA, lo que representa un 8,6 % más que va un añu. Unu de cada trés pasaxeros benefíciase yá de les ventayes de la tarifa CONECTA y los datos reflexen, de manera sostenida, una progresiva incorporación del usu del tresporte públicu a los vezos de movilidá de la ciudadanía.
De forma paralela al serviciu de CONECTA y de les polítiques de refuerzu y meyora del serviciu de tresporte públicu, el Gobiernu d’Asturies ta desenvolviendo una batería d’actuaciones de meyora d’infraestructures venceyaes al tresporte públicu que suponen una inversión global de más de 20,5 millones de fondos europeos en siete conceyos.
