La Selmana Grande de Xixón 2025, ensin música nin teatru n’asturianu

La programación oficial de la Selmana Grande de Xixón 2025 vuelve un añu más ensin dar espaciu a la creación cultural na llingua propia d’Asturies.
Nengún grupu musical que cante n’asturianu forma parte de los escenarios principales, y tamién nun s’incluyó teatru escritu n’asturianu.
Les cites más destacables —como los conciertos de la Playa de Poniente o los espectáculos na Plaza Mayor— tán protagonizaos por artistes estatales o internacionales como Bonnie Tyler, Rosario Flores, Abraham Mateo, Don Patricio o Los Secretos. La presencia d’artistes asturianos ye mínima y, nel casu de la llingua, nula.
Esta ausencia confirma una tendencia que yá se repitió n’otres ediciones: la falta de programación cultural n’asturianu dientro del marcu de la fiesta más importante de la ciudá.