El próximu sábadu 25 d’abril, a les seis de la tarde, na Sala 1 de los Cines Embajadores d’Uviéu va presentase’l documental “Y agora que lo baillen los rapacinos: lo Llixero n’Asturies”. Un trabayu d’Andecha Folclor d’Uviéu, basáu na tercer entrega del Cancioneru l’Andecha: lo llixero n’Asturies, ún de los pocos cancioneros trataos dende’l puntu de vista del baille tradicional, onde se fai un analís detalláu d’esti xéneru de baille, ello ye, los bailles a lo llixero n’Asturies: con que nomes se conoz; lamanera de baillase según nes distintes zones del País; la mesma disposición de los bailladores y los sones emplegaos pa baillar.
Nel documental, faise un percorríu per esti xéneru de baille n’Asturies, grabando n’escenarios que representen les distintes zones d’Asturies onde ta presente’l baille, combinando pieces instrumentales, xunto con otres baillaes por miembros de L’Andecha y entemeciendo archivos audiovisuales del trabayu de campu fechu pol grupu a lo llargo d’estos años nel que se basa esti documental.
Esti trabayu foi producíu por “Cuatro Gotes Producciones” y cuntó col sofitu de la Conseyería de Cultura, Política Llingüística y Deporte del Principáu d’Asturies.
