Asturies participa güei y mañana, al traviés de la Conseyería de Cultura, Política Llingüiística y Deporte, nel eventu profesional Sports Summit Madrid 2026, el gran alcuentru global de la industria del deporte qu’axunta a alministraciones públiques, empreses, clubes, federaciones, entidaes especializaes, espertos ya inversores p’analizar el papel de l’actividá física y el deporte como xeneradores de salú, innovación, emplegu, turismu y desenvolvimientu económicu.
La presencia asturiana nesti foru enmárcase na estratexa impulsada pol Executivu autonómicu p’afitar la posición d’Asturies como un territoriu activu, saludable y sostenible, nel que’l deporte constitúi una ferramienta de bienestar y desenvolvimientu social y territorial. Esta estratexa refléxase n’iniciatives como ADN. Asturies, Deporte y Naturaleza, cola que’l Principáu impulsa actividaes y eventos por tola comunidá vinculaos a la salú y l’aprovechamientu de la redolada natural.
Al traviés d’un espaciu propiu, Asturies va amosar les oportunidaes qu’ufierta la comunidá pa la práctica deportiva, especialmente nel mediu natural, asina como la so capacidá p’acoyer competiciones, eventos y actividaes vinculaes al turismu activu y al deporte al aire llibre. Esti estand, a disposición de les entidaes participantes, va ser puntu d’alcuentru p’amosar el trabayu que desenvuelven n’Asturies.
Van participar nesti alcuentru la Confederación de Federaciones Deportives d’Asturies (Confedepa), la Federación de Deportes pa Persones con Discapacidá Física del Principáu d’Asturies (Fedema), l’Asociación Sin Límites y la Fundación Muséu y Circuitu Fernando Alonso, que van contribuyir a espublizar delles de les iniciatives más representatives que se desenvuelven anguaño.
Dientro del programa del eventu, la Fundación Fernando Alonso y Fedema van participar tamién nel denomináu Speaker Corner, un espaciu destináu a la presentación de proyectos y esperiencies de referencia. Dambes entidaes van amosar iniciatives vinculaes a la inclusión, la promoción de vezos de vida saludables y la capacidá d’Asturies pa entamar y acoyer eventos d’impactu.
