Les cais d’Uviéu van convertise esti sábadu nun gran escenariu de les mazcaraes tradicionales de la Península Ibérica. Alredor de 600 participantes y más de 30 grupos procedentes de distintos territorios d’España, Portugal y Andorra van protagonizar el Desfile Internacional de la Mázcara Ibérica, actu central del XVIII Festival Internacional de la Mázcara Ibérica (FIMI). La celebración coincide amás col entamu del procesu pa declarar bien d’interés cultural (BIC), de calter inmaterial, el conxuntu de les mazcaraes d’iviernu, una iniciativa empobinada a reforzar la so protección y garantizar la so tresmisión.
El desfile va partir a les 17:00 hores dende la plaza del Conceyu d’Uviéu y va concluyir nel Paséu del Bombé, convirtiendo mientres tola tarde la capital asturiana nun gran escaparate del patrimoniu cultural vinculáu a les mazcaraes. Personaxes ancestrales, rituales festivos, música y tradiciones tresmitíes de xeneración en xeneración van dar cita nun percorríu que va axuntar dalgunes de les espresiones más singulares y reconocibles del patrimoniu cultural européu.
Per primer vegada van tar representaos tolos territorios de la Península Ibérica, gracies a la participación d’una delegación d’Andorra, que se suma a los grupos llegaos d’Asturies, del restu d’España y de Portugal. El desfile va cuntar, amás, con agrupaciones procedentes de Galicia, Castiella, Llión, Cantabria, La Mancha y Estremadura.
La xornada va incluyir tamién intervenciones artístiques vinculaes al percorríu, ente elles una creación en directu de l’artista Clo Bougard inspirada nes mazcaraes, asina como la participación de l’Asociación de Profesionales de la Ilustración d’Asturies (APIAST).
El desfile va poner el broche final a una edición histórica del Festival Internacional de la Mázcara Ibérica. Per primer vegada dende la so creación nel 2006, el principal alcuentru internacional dedicáu a les mazcaraes tradicionales celébrase fuera de Portugal, en reconocencia al papel desempeñáu polos colectivos asturianos y al trabayu de les comunidaes portadores que contribuyeron a caltener estes tradiciones.
Dende’l pasáu 12 de xunu, Asturies acoyó una programación diversa que combinó patrimoniu, investigación, creación contemporanea y participación ciudadana. Esposiciones, conciertos, xornaes académiques, alcuentros especializaos, proyecciones y presentaciones editoriales convirtieron a la comunidá en puntu de referencia internacional nel ámbitu de les mazcaraes tradicionales.
La programación inauguróse col conciertu de Felpeyu y un homenaxe a Kepa Junkera, y siguió con actividaes n’Uviéu, Ayande, Villaviciosa, Siero y Xixón, amás de n’espacios de referencia como Llaboral Ciudá de la Cultura, el Muséu Arqueolóxicu d’Asturies, el Muséu de Belles artes d’Asturies y la Universidá d’Uviéu.
