El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, destacó la meyora decisiva llograda güei na xunta que caltuvo en Madrid colos responsables de la Sociedá de Xestión d’Activos Procedentes de la Reestructuración Bancaria (Sareb) y una representación vecinal del inmueble de la cai Ríu Piloña de Xixón pa poner fin a un conflictu que s’enllarga dende va años.
Zapico confió en que la formalización conxunta de los contratos pueda realizase a finales de mes, una vegada resueltes les últimes cuestiones técniques plantegaes polos residentes. Dempués de casi diecinueve meses de trabayu ya intermediación, güei dimos un pasu de xigante escontra la solución definitiva d’esti conflictu, valoró.
Nesti sen, recordó que’l so departamentu se comprometió a acompañar a los residentes d’esti edificiu na busca d’una solución y sorrayó qu’esti sofitu se remonta a xineru del 2025. Veníemos cola voluntá de solucionar un problema que lleva enquistáu demasiáu tiempu. Yo mesmu llevo participando na intermediación dende xineru del 2025 y creo que güei dimos un pasu mui importante pa resolver definitivamente esti pleitu, señaló.
Mientres l’alcuentru, representantes de la Sareb reconocieron la función desempeñada pol Executivu asturianu y destacaron que nun esisten precedentes d’un conseyeru autonómicu que s’implicara hasta’l puntu de favorecer una xunta d’estes característiques y acompañar personalmente a los vecinos na negociación. A xuiciu de Zapico, esta reconocencia pon de manifiestu’l compromisu del Gobiernu d’Asturies cola defensa del derechu a la vivienda y cola busca de soluciones pa les families afectaes.
Según detalló, la xunta sirvió pa esclariar cuestiones qu’entá xeneraben duldes ente los vecinos al respective de les condiciones de los contratos d’arrendamientu. “Atopemos bona disposición per parte de la Sareb y avanzóse muncho nos flecos que quedaben pendientes. Tamos yá en condiciones de resolver esti conflictu y de que, primero que llegue agostu, los vecinos puedan roblar los sos contratos”, aseguró.
La firma d’estos nuevos contratos va dexar a les families encarar el futuru con mayor seguridá. “Van poder garantizar la tranquilidá y la estabilidá que precisen; tener la garantía d’un techu seguru ye daqué fundamental”, añedió’l conseyeru.
A lo último, el titular de Vivienda consideró que l’alcuentru tamién supón una meyora na nueva orientación social que la Sareb ta llamada a desenvolver de la mano de Casa 47 (l’antigua Sepes). “La Sareb tien que siguir avanzando escontra esi nuevu conceptu social amestáu a Casa 47, una empresa pública estatal cola que queremos coordinanos como alministración autonómica. Güei dimos un bon pasu nesa dirección”, señaló.
