La Conseyería de Ciencia, Industria y Emplegu, al traviés de la Fundación pal Fomentu n’Asturies de la Investigación Científica y la Tecnoloxía (FICYT), súmase a la iniciativa del Conseyu Cimeru d’Investigaciones Científiques (CSIC) y el Conceyu d’Avilés pa rindir tributu a Francisco Ibáñez cola esposición La ciencia de Mortadelo y Filemón, que podrá vese hasta’l 30 de setiembre na Sala del Cómic d’Avilés.
El proyectu propón un percorríu visual y temáticu al traviés de portaes publicaes ente 1975 y 2018 que s’estremen en cinco secciones. L’amuesa representa una oportunidá pa conectar la conocencia científica con públicos diversos per aciu l’humor, la creatividá y la cultura popular, utilizando l’universu de Francisco Ibáñez como ferramienta de divulgación y reflexón sobre los grandes retos científicos y tecnolóxicos del nuestru tiempu.
