El presidente d’Asturies, Adrián Barbón, aseguró’l pasáu sábadu que “la oficialidá amable de la llingua ye un compromisu cola sociedá asturiana”, mientres la XXX Fiesta de la Oficialidá de la Llingua Asturiana, celebrada en Bimenes, onde reafitó’l so apueste por avanzar na normalización dende l’entendimientu.
El xefe del Executivu sorrayó que “la llucha pola oficialidá y la responsabilidá institucional van de la mano” y convidó a los grupos políticos a “trabayar nesa oficialidá amable”, superando postures engarraes. Coles mesmes, destacó que’l Gobiernu d’Asturies “trabayó toos estos años na normalización y na defensa de la llingua” y confió en llograr meyores “más llueu que tarde”.
Tamién encamentó a la ciudadanía a reflexonar en clave identitaria: «Cuando la xente vote, que piense tamién nestes coses». Al tiempu encamentó a tener en cuenta “quién defende la identidá d’Asturies” y señaló qu’hai partíos que tienen una postura diferente a ún y otru llau del Eo.
