El Premiu de Guión Cinematográficu en llingua asturiana y eonaviego, promovíu pola Conseyería de Cultura, Política Llingüística y Deporte, reconoció’l trabayu de María Ruisánchez Ortega (Ouviñana, 1983), autora del guion ¡A lo xo!. El galardón, dotáu con 6.000 euros, ye una amuesa del trabayu del Gobiernu d’Asturies pa promover y espublizar les llingües autóctones y consolidar la so presencia nel ámbitu cultural y audiovisual.
El xuráu d’esta edición tuvo presidíu pol director xeneral d’Acción Cultural y Normalización Llingüística, Antón García, y integráu polos cineastes Diego Flórez y Samuel Fernandi, los profesores Enrique García y Yedra Riesgo, y la directora del Centru Integráu de Formación Profesional pa la Comunicación, Imaxe y Soníu de Llangréu (Cislan), María Isabel Lugilde.
A xuiciu del xuráu, la obra ganadora supón “una propuesta innovadora qu’incorpora de manera suxerente l’animación pa construyir la historia d’un territoriu y una dómina que tien les señes d’identidá del nuestru pasáu colectivu al traviés de los güeyos d’una neña”. El fallu destaca tamién l’usu de referencies culturales asturianes y internacionales, asina como la construcción “coherente y realista de los personaxes femeninos”, que dexa afrontar con naturalidá asuntos como la memoria democrática o les relaciones interxeneracionales.
María Ruisánchez Ortega ye llicenciada en Periodismu pola Universidá Complutense, onde cursó tamién un máster d’estudios lliterarios, y graduada en Guion de Cine y Televisión pel Institutu de Cine de Madrid. La so esperiencia como guionista en diversos formatos inclúi trabayos pa RTVE, Cuatro, Neox, Antena 3, La Sesta, Amazon Prime o Playz, y collaboraciones como freelance pal Grupu Prisa o la productora El Terrat, d’Andreu Buenafuente. Tamién escribió la serie de ficción sonora Mix97, emitida por Radio Catalunya y nomada a Meyor Podcast de ficción, y ye coautora de la película IXTAB: Evil Legacy.
Na so faceta lliteraria, ye autora de les noveles El inventor de sombras, Dimos vueltas en la noche y fuimos consumidos por el fuego y KAOS. Llogró l’accésit nel Premiu de Relatu Curtiu Luis Landero por Aleste y foi finalista nel VIII Concursu de Relatu de Muyeres Viaxeres con una crónica sobre un viaxe a Llíbano. Per otru llau, foi una de les galardonaes na Amuesa d’Artes Plástiques del Principáu del 2017 cola obra Miénteme. Retóricas mediáticas.
