El Presidente de l’Academia, Xosé Antón González Riaño, y la Directora de la UABRA, Claudia Elena Menéndez Fernández, xunto cola Vicerrectora d’Estensión Universitaria y Proyeición Cultural, Marta Mateo Martínez de Bartolomé, fueron los encargaos de dar la bienllegada a la presente edición del programa formativu estival que la institución llingüística entama cola collaboración de la Universidá d’Uviéu y el sofitu de la Fundación Municipal de Cultura del Conceyu d’Uviéu. El saludu, dirixíu al profesoráu y al alumnáu de los cursos, fíxose na Sala de Xuntes del Departamentu de Filoloxía Clásica y Románica, na Facultá de Filosofía y Lletres d’El Milán, a les 9 de la mañana del llunes 20 de xunetu.
Dende entós y hasta’l vienres 24, les instalaciones universitaries de Santuyano van acoyer el cursu de Formación Llingüística Xeneral «Preparación pa la certificación C1 de llingua asturiana» y los cursos d’Afondamientu Cultural y Llingüísticu «El movimientu obreru na lliteratura asturiana contemporánea» ya «Intelixencia Artificial aplicada al aula de Llingua Asturiana». Claudia Elena Menéndez, Académica y Secretaria de la institución y profesora de la Universidá d’Uviéu, ye la directora del primeru, mientres que Darío de Dios y Roberto Avello, tamién profesores de la Universidá d’Uviéu, dirixen respectivamente los cursos d’afondamientu. Toos trés tienen una duración de 25 h n’horariu de mañana.
Amás, a lo llargo la selmana, l’alumnáu va poder afondar na so formación con delles actividaes complementaries, ente les que destaquen: el llunes, un diálogu ente Claudia Elena Menéndez ya Inaciu Galán alredor del proyectu del Pequeñu Atles Llingüísticu d’Asturies (PALLA) y una sesión de cine sotituláu n’asturianu nel Cine Embajadores Foncalada; y, el xueves, visites guiaes (namás pa los estudiantes de la UABRA) a l’Academia de la Llingua Asturiana y pel centru d’Uviéu, conociendo la historia de la llingua asturiana y una mesa redonda nel Club de Prensa de La Nueva España sobre los «50 años de la manifestación de Conceyu Bable». Tola información sobre’l programa formativu pue consultase na web institucional https://alladixital.org/cursos-de branu-uvieu.
