Ayeri na Llaboral Ciudá de la Cultura presentóse la delegación oficial que va representar a Asturies nel 55 Festival Intercélticu de Lorient, que se va celebrar dende’l próximu vienres y hasta’l 9 d’agostu na ciudá francesa. Esti añu cúmplese’l 40 aniversariu de la primer presencia institucional d’el Principáu’Asturies nel eventu, empecipiada en 1986. Pa conmemoralo, la delegación va partir con 150 persones pa participar nel mayor alcuentru internacional dedicáu a les cultures celtes, con una programación que aúna tradición y creación contemporanea y que reflexa la riqueza y diversidá del patrimoniu asturianu.
La edición d’esti añu, dedicada a Cornualles sol lema Cornualles, nel corazón del mar célticu, va axuntar a representantes de los territorios celtes d’Europa y América nun ampliu programa de conciertos, desfiles, esposiciones, alcuentros culturales y actividaes formatives. Cada branu, el festival rexunta a cientos de miles de visitantes y consolidóse como’l gran escaparate internacional de les cultures d’orixe celta. Cuatro décades dempués del entamu d’esa presencia institucional, Asturies encara esta edición con una amplia delegación y novedaes que refuercen la diversidá de la so representación.
La música y la danza tradicional volverán ocupar un llugar protagonista cola participación de la Banda de Gaites El Gumial, el Grupu Etnográficu L’Oriente-Llacín, Rubén Alba, Llevólu’l Sumiciu, Herbamora, Ferla Megía, Entós y Rellume. Tamién va tar presente’l gaiteru Iñaki Sánchez Santianes de Molenes, que va actuar como solista con Shaun Davey & L’Orchestre du Festival Interceltique. Ente les novedaes figura tamién la participación La Tarabica, la banda de gaites del Centru Asturianu de Guadarrama (Madrid).
La gaita asturiana va tener, amás, un papel destacáu nel Troféu MacCrimmon, ún de los momentos más emblemáticos del festival. Diego Lobo Tuñón, Pelayo Cordero, Pelayo Suárez y Nel Cortizo van competir nesti prestixosu certame internacional. El primeru d’ellos va impartir, amás, una clase maxistral, mientres que Francisco López Delgado y Eduardo Llosa van formar parte del xuráu.
La delegación va cuntar tamién con representación nel Interceltic Music Camp, onde Julio Rodríguez va participar na especialidá de buzuki y Celia Nieto na de violín, dientro d’un programa qu’axunta a nuevos intérpretes de territorios con raíces celtes pa compartir formación y esperiencies.
El cantar asturianu va viaxar a Lorient de la mano d’Alicia Villanueva Megido, Esteban Verdeja Martínez y Néstor Díaz González, ganadores del II Premiu Nacional d’Asturianada Obdulia Álvarez La Busdonga, qu’anguaño s’incorporen per primer vegada a la delegación oficial, frutu de la collaboración ente’l Gobiernu d’Asturies y l’organización del festival pa impulsar la promoción internacional de la tonada.
La presencia asturiana va completase cola proyección de la película Muyeres, dirixida por Marta Lallana, y cola esposición Apuntes dende Bretaña: pintores españoles nel Finisterre francés, comisariada por Luis Feás, una propuesta que pon el focu nos venceyos históricos y culturales ente Bretaña y España. La incorporación d’esta amuesa constitúi otra de les novedaes de la programación.
D’esta miente, Asturies volverá asitiase nún de los principales foros internacionales con una delegación que reflexa l’amplitú del so panorama cultural. El 40u aniversariu dexa, amás, poner en valor una presencia institucional siguida que convirtió Lorient nun espaciu estable pa la proyección esterior de la cultura asturiana.
Música, danza, patrimoniu inmaterial, creación contemporanea, cine y artes visuales van compartir escenariu en Lorient pa brindar una imaxe d’Asturies abierta al intercambiu cultural, arguyosa de la so identidá y comprometida col espardimientu del so patrimoniu dientro y fora de les sos fronteres.
