L’estand del Gobiernu d’Asturies na FIDMA superó los 150.000 visitantes, con un máximu diariu de 16.887 persones, que s’algamó’l día 15 d’agostu. Estos datos, entá provisionales, revelen que l’afluyencia creció más d’un 36% al respective del 2025, cuando se cerró con 110.000 visites, y encadena trés años consecutivos batiendo los sos propios rexistros. “Esti pabellón dexó amosar la meyor Asturies d’estos 45 años d’autonomía: una comunidá que supo tresformase, ampliar derechos, fortalecer los servicios públicos y encarar los retos del futuru ensin arrenunciar a la so identidá”, destacó Vanesa Gutiérrez, conseyera de Cultura Política Llingüística y Deporte.
Baxo’l lema Asturies yes tu, el pabellón ufiertó un percorríu inmersivu polos 45 años de vixencia del Estatutu d’Autonomía y amosó cómo evolucionó la comunidá dende la recuperación del so autogobiernu hasta l’actualidá. La esposición dexó descubrir, de forma participativa y accesible, les meyores llograes n’ámbitos como la sanidá, la educación, la igualdá, la ciencia, la innovación, la movilidá, la cultura o los servicios públicos, asina como los elementos que conformen la identidá colectiva asturiana.
La programación desenvuelta nes dos selmanes de feria convirtió esti espaciu institucional nun puntu d’alcuentru pa miles de visitantes, que participaron nes 126 actividaes entamaes. Mientres estos díes, l’estand acoyó exhibiciones de robótica, esperiencies vinculaes a la realidá aumentada, demostraciones tecnolóxiques, talleres gastronómicos, forxa en vivu y propuestes rellacionaes colos xuegos tradicionales asturianos.
Ente los elementos que más interés espertaron destaquen la exhibición del robot quirúrxicu Da Vinci, los percorríos pela historia recién d’Asturies al traviés d’imáxenes y testimonios, asina como tolos actos rellacionaos col eclís solar del pasáu 12 d’agostu, pal que se distribuyeron cerca de 75.000 gafes homologaes. El fotomatón tamién se convirtió nuna de les árees más allegaes y fixo posible que más de 12.000 persones llevaren un alcordanza d’esta edición conmemorativa.
Amás de l’actividá espositiva, el pabellón acoyó presentaciones institucionales, alcuentros sectoriales, y visites de representantes d’alministraciones públiques, entidaes sociales, empreses y colectivos de tola comunidá.
