El segundu adelantu del FICX inclúi un focu a la cineasta arxentina Masia Silvia Esteve
El Festival Internacional de Cine de Xixón, que va celebrar el so 64er edición del 13 al 21 de payares, amplía la so programación con once nueves películes y un focu dedicáu a la directora y productora arxentina María Sílvia Esteve. Ente les incorporaciones figuren Shame and Money y To Hold a Mountain, ganadores de los Grandes Premios del Xuráu de les competiciones World Cinema Dramatic y World Cinema Documentary de Sundance, que van tener nel FICX el so estrenu n’España. Les competiciones internacionales Albar y Retueyos incorporen cuatro títulos procedentes de Cannes, Sundance y Róterdam; FICX Premiere va axuntar los nuevos trabayos de Jia Zhangke, Mohammad Rasoulof y Teodora Ana Mihai; y Esbilla va sumar cuatro películes que pasaron per certames como Cannes, Sundance, Sarajevo o Visions du Réel.
Albar: la precariedá y les fronteres
Ganadora del Gran Premiu del Xuráu de la competición World Cinema Dramatic en Sundance y del CineMasters Award al Meyor Llargumetraxe Internacional del Festival de Múnich, Shame and Money (Serbia, 2026), que va tener en Xixón el so estrenu español, supón el regresu de Visar Morina al so país d’orixe dempués de Exile. Nel so tercer llargumetraxe, Shaban, un ganaderu incapaz de caltener económicamente la esplotación familiar, treslládase cola so muyer y los sos trés fíes a Pristina. La busca de trabayu y l’adaptación a la ciudá enfrenten a la familia a nueves relaciones de dependencia económica y a unes diferencies sociales que ponen a prueba los sos venceyos.
Venti años dempués de recibir el máximu galardón en Xixón con Longing, Valeska Grisebach volverá competir en Albar con The Dreamed Adventure (Alemaña, Bulgaria, 2026), Premiu del Xuráu del Festival de Cannes 2026. La cineasta alemana asitia’l so cuartu llargumetraxe, qu’incorpora progresivamente elementos del cine criminal, en Svilengrad, localidá búlgara próxima a les fronteres con Grecia y Turquía. Ellí, Said torna dempués d’una llarga ausencia y arréyase nuna operación illegal de compraventa de combustible.
Retueyos: families que se seden, mundos que camuden
La ópera prima del croata Igor Jelinović, Honey Bunny (Croacia, Serbia, 2026), va llegar a Retueyos dempués d’estrenase mundialmente en Bright Future del Festival de Róterdam y llograr darréu’l Gran Arena d’Oru a la Meyor Película nel Festival de Pula, onde recibió amás los premios al meyor guion y a les interpretaciones de Snježana Sinovčić Šiškov y Aleksandra Janković. El FICX y la Mostra de València-Cinema del Mediterrani van compartir l’estrenu n’España de la película. Tonina lleva años ocupándose de la so madre nonagenaria y tratando de caltener xunía a una estensa familia en Split. Cuando ruempe un alcuerdu cola so hermana pa facese con una parte d’una casa na islla de Hvar, una disputa inmobiliaria fái aprucir antiguos sacrificios y rensíes familiares.
Tamién debuta nel llargumetraxe Katharina Rivilis con I’ll Be Gone in June (Alemaña, Estaos Uníos, 2026), producida por Wim Wenders y presentada n’Un Certain Regard del Festival de Cannes. Inspirada na esperiencia de la mesma directora como estudiante d’intercambiu, la película sigue a Franny, una adolescente alemana de 16 años que llega a Nuevu Méxicu nel branu del 2001. Les sos primeres esperiencies sentimentales y sexuales coinciden colos atentaos del 11 de setiembre y colos cambeos qu’estos provoquen na sociedá estadounidense que l’acueye.
FICX Premiere: desplazamientos, memoria y instituciones
El FICX incorpora a la so sección Premiere l’estrenu n’España de Torino Shadow, de Jia Zhangke, una película que conecta China ya Italia al traviés d’una pareya separada pola distancia y del trabayu colos archivos del Muséu Nazionale del Cinema de Turín. Tamién va llegar Sense of Water, de Mohammad Rasoulof, sobre un escritor iranín exiliáu n’Alemaña qu’intenta recuperar la so capacidá creativa mientres s’adapta a una nueva llingua. Completa l’apartáu Heysel 85, de Teodora Ana Mihai, que reconstrúi la traxedia del estadiu de Heysel dende la perspectiva de los despachos y les instituciones que xestionaron la catástrofe.
Esbilla: families, territoriu y deprendimientu de l’autoridá
Esbilla va axuntar cuatro nuevos títulos qu’afronten les relaciones familiares, el territoriu y les estructures de poder. Christophe Honoré va visitar Xixón pa presentar Orange-Flavoured Wedding, centrada en siete hermanos aconceyaos nuna boda na Nantes de 1978. To Hold a Mountain, de Biljana Tutorov y Petar Glomazić, sigue a una pastora y la so fía adolescente nuna comunidá montenegrina movilizada contra la utilización del so territoriu como campu militar. Guillaume Massart va presentar La détention, qu’observa la formación de futuros funcionarios de prisiones, mientres que Saudades Eternes, ópera prima de Emma Boccanfuso, avérase a una familia d’una favela de Ríu marcada poles ausencies, los curiaos y la violencia.
María Sílvia Esteve: siete obres y un alcuentru en Llaboral
El 64 FICX va dedicar un focu a la cineasta arxentina María Sílvia Esteve, con siete obres que percuerren el so trabayu cola memoria, l’archivu familiar y la representación del trauma. El programa inclúi los sos llargumetraxes Silvia y Mailin, amás de curtiumetraxes como Criatura, The Spiral y Cortex, xunto con otros trabayos menos conocíos de la so trayectoria. El 20 de payares, Llaboral va acoyer un alcuentru ente Esteve y la cineasta Natalia Grande, moderáu por Ramón Rey, nel que van compartir procesos creativos y materiales inéditos. El focu va tener darréu itinerancia per otres sales y va coincidir col estrenu comercial de Mailin el 27 de payares.
