Naz la Rede de Teatros y Auditorios del Principáu d’Asturies (Retea) y abre la convocatoria pa escoyer la so programación
La Conseyería de Cultura, Política Llingüística y Deporte pón en marcha la Rede de Teatros y Auditorios del Principáu d’Asturies (Retea), una nueva estructura de collaboración colos conceyos pa favorecer la ufierta estable d’artes escéniques y música nos conceyos.
La creación de Retea da respuesta a un pidimientu históricu del sector cultural asturianu. La conseyería comprometióse al empiezu de la llexislatura a atender esta reivindicación, que se materializa agora cola apertura de la primer convocatoria pa escoyer los espectáculos que van formar parte de la ufierta de la rede.
Nesta convocatoria puen participar persones físiques o xurídiques dedicaes a les artes escéniques y/o música como compañíes, productores o distribuidores, que van poder presentar propuestes de teatru, danza, música, circu, maxa, teatru d’oxetos/títeres, asina como propuestes multidisciplinares.
Cada espectáculu, con un caxé máximu de 8.000 euros más IVA, tendrá de poder representase n’espacios con característiques técniques mínimes tocantes a escenariu, aforu (mínimu de 150 butaques), llume, soníu o accesibilidá, detallaes na convocatoria, disponible na web asturiesculturaenrede.es. Cada compañía profesional, productora o distribuidora solo va poder allegar con un únicu proyectu, que nun va poder presentar coles mesmes a nengún de los circuitos culturales de Asturies, Cultura en Rede.
Les solicitúes tramítense al traviés de http://panel.asturiesculturaenrede.es hasta’l 13 d’ochobre a les 23:59 hores. Una comisión va encargase de validar les solicitúes acordies con los criterios fitos nes bases.
Colos espectáculos escoyíos, va ellaborase un catálogu dixital que se va poner a disposición de los conceyos que dispongan de la infraestructura necesaria pa xuntase a Retea. Los conceyos van poder escoyer les propuestes que deseyen incorporar a les sos programaciones culturales, que se van desenvolver ente’l 18 d’avientu d’esti y el 30 de xunu del 2027.
Amás d’esti nuevu circuitu creáu nel marcu de la Rede de Teatros y Auditorios del Principáu d’Asturies, la conseyería acaba d’abrir les nueves convocatories pa escoyer los proyectos de los circuitos d’artes escéniques, artes visuales, música, cultura tradicional, lliteratura, cultura sidrera y narración oral de Asturies, Cultura en Rede.
