Salú amplía la vacunación infantil frente al gripe hasta los 13 años p’amenorgar la circulación del virus ente les families

La Conseyería de Salú refuerza esta temporada la protección de la población infantil frente al gripe cola ampliación de la vacunación sistemática hasta los 13 años. La campaña actual, que va algamar a un total de 84.279 menores, combina consultes pediátriques y puntos específicos de vacunación pa facilitar l’accesu de les families.

La principal novedá ye la incorporación de la vacuna intranasal pa neños y neñes de 2 a 13 años. El Serviciu de Salú d’Asturies (Sespa) adquirió 44.000 dosis de la vacuna que s’alministra pela ñariz, ensin nenguna molestia, y evita les pinchaes, lo que pue contribuyir a ameyorar l’aceptación de la inmunización ente la población infantil.

El dispositivu previstu diferencia dos circuitos asistenciales.

• Los menores d’ente 6 y 23 meses van recibir la vacuna antigripal inyectable nes consultes de pediatría y enfermería Pediátrica.
• La población de 2 a 13 años va recibir la profilaxis, preferentemente cola fórmula intranasal, en 30 puntos habilitaos pol Sespa, la mayoría n’horariu de tarde.

Pa facilitar la organización y evitar desplazamientos o xestiones innecesaries, les families nun van tener que solicitar cita. Salú va unviar primero un SMS informativu y darréu va contactar telefónicamente p’alcordar día, hora y llugar de vacunación per aciu l’asistente virtual NOAH.

La vacunación infantil empezó’l 1 d’ochobre coles mires de protexer a los menores, ún de los grupos onde suel empecipiase la tresmisión, y contribuyir asina a amenorgar la circulación del virus tanto ente les families como en tola comunidá.

Baxo’l lema El gripe suel empezar ente los más pequeños. La protección tamién, la campaña pón el focu na prevención y na ampliación de la cobertoria vacunal infantil como ferramienta clave pa llimitar l’impactu de la enfermedá mientres los meses de mayor circulación del virus.