El gobiernu algama un principiu d’alcuerdu con Indra pal usu del taller de Barros mientres 25 años, con una inversión anicial mínima de siete millones
El Gobiernu d’Asturies llegó a un principiu d’alcuerdu cola empresa Indra pal usu del taller de Barros, en Llangréu, mientres 25 años, en réxime d’arriendu, y qu’implica una inversión mínima estimada de siete millones el primer añu. La propuesta, qu’e tienen de’han formalizar los órganos de gobiernu tanto de la compañía como de la Sociedá Rexonal de Promoción (SRP), permite una nueva fábrica de componentes y productos pa la industria de defensa na comunidá.
Indra va ocupar les instalaciones de Barros per aciu un contratu d’arrendamientu con una duración de 25 años, una fórmula que garantiza estabilidá pal desenvolvimientu de l’actividá industrial y seguridá p’acometer les inversiones previstes. L’arriendu va afitase con criterios puramente oxetivos y de mercáu. Pa eso, una empresa tasadora independiente, acreditada pol Bancu d’España, va determinar el preciu. El prealcuerdu inclúi’l compromisu d’Indra de destinar la inversión necesaria p’afacer les instalaciones y poner en marcha la segunda fábrica de la compañía n’Asturies. Teniendo en cuenta el tipu d’actividá y el sector, calcúlase un mínimu de siete millones nel primer añu.
L’oxetivu ye cerrar nes próximes selmanes tanto la compra del taller a Duro Felguera, por un importe de 10,7 millones, como la cesión en réxime d’arriendu a Indra de les instalaciones de Barros. El complexu de Barros cunta con cerca de 80.000 metros cuadraos distribuyíos ente diverses edificaciones y árees productives. Indra va asumir les inversiones necesaries pa rehabilitar, acondicionar y equipar los espacios, col fin de tresformalos nuna planta destinada a la fabricación de componentes pa la industria de defensa.
La propuesta impulsada pol Gobiernu d’Asturies al traviés de la SRP tien trés oxetivos: reforzar l’actividá industrial nun sector estratéxicu, favorecer la creación d’emplegu de calidá y garantizar l’aprovechamientu productivu al llargu plazu d’unes instalaciones con amplia tradición industrial.
La estratexa del Executivu autonómicu pola industria de la defensa algama un gran polu con grandes empreses tractores a nivel mundial como Indra, Santa Bárbara, Rheinmetall y Escribán Mechanical Engineering, xuntu con un importante texíu de pequeñes y medianes compañíes. El proyectu industrial va xenerar un impactu económicu directu, midíu en términos de valor añedíu brutu (VAB), d’ente 500 y 600 millones y va crear ente 400 y 450 puestos de trabayu, directos ya inducíos.
