Barbón robla les nueves lleis de sofitu al colectivu LGTBI y d’Infancia y Adolescencia
El presidente d’el Principáu’Asturies, Adrián Barbón, robló ayeri les dos nueves lleis autonómiques aprobaes na Xunta Xeneral: la de protección de derechos del colectivu LGTBI y la d’Infancia y Adolescencia, dos normes coles qu’Asturies sigue avanzando en derechos sociales.
La Llei de Erradicación de la Discriminación y pa la Igualdá Real y Efectiva de Derechos de les Persones Lesbianes, Gais, Trans, Bisexuales, Intersexuales y de les sos Families supón un finxu, porque Asturies yera una de les dos úniques comunidaes ensin llexislación propia nesti ámbitu. La norma, que garantiza los derechos de toles persones independientemente del so sexu, xéneru o identidá, constitúi un preséu clave pa lluchar contra la LGTBIfobia y tuvo un ampliu respaldu, yá que namás cuntó col votu en contra de VOX.
Barbón destacó que se trata d’una conquista de munchos años de reivindicación de los colectivos d’Asturies. “Costó muncho llegar equí, munchu esfuerzu en munchos ámbitos, y a la fin consiguióse”, valoró. El líder del Executivu aprofió que “tres de la llei tienen que venir los recursos necesarios pa implementala” y defendió qu’Asturies seya “un territoriu cada vez más llibre en derechos y llibertaes onde nun se xulgue a naide, independientemente de la so orientación”.
Pela so parte, la Llei d’Infancia y Adolescencia supón la mayor actualización del sistema asturianu de protección a la infancia nes postreres trés décades. La norma sustitúi a la llexislación vixente dende 1995 y adapta’l marcu autonómicu a los cambeos sociales y normativos producíos dende entós. Nesti sentíu, incorpora les meyores impulsaes pola llexislación estatal y los nuevos desafíos rellacionaos cola salú mental, la violencia contra la infancia y l’adolescencia, la igualdá d’oportunidaes y la protección na redolada dixital
El presidente sorrayó qu’esta norma va asitiar Asturies “mui per delantre d’otres comunidaes nel apueste pola infancia y l’adolescencia”. Barbón, que se declaró mui arguyosu, punxo en valor una llei que s’ellaboró conxuntamente colos grupos de participación d’infancia y adolescencia.
