Cultura concede’l Premiu ‘Juan Uría Ríu’ a Jonathan Álvarez Díaz por una investigación sobre’l patrimoniu arquitectónicu de la Universidá d’Uviéu
La Conseyería de Cultura, Política Llingüística y Deporte concedió’l Premiu Juan Uría Ríu d’Investigación 2026 a Jonathan Álvarez Díaz pol so trabayu Los campus universitarios n’España: el legáu del Movimientu Modernu. El casu de la Universidá d’Uviéu. El xuráu de la 43.er edición alcordó por unanimidá reconocer una investigación que dexa conocer meyor el patrimoniu arquitectónicu universitariu y ufierta nueves perspectives sobre la historia de l’arquitectura contemporanea.
L’estudiu avérase a los campus universitarios como espacios que tamién cunten la historia d’una dómina. Al traviés del análisis del Movimientu Modernu y de la so presencia na Universidá d’Uviéu, la investigación contribúi a conocer una parte del patrimoniu arquitectónicu que forma parte de la vida cotidiana de delles xeneraciones d’estudiantes y de la mesma evolución de la enseñanza cimera.
El xuráu valoró especialmente la solidez del trabayu, la so estructura y la so aportación a les llinies más recientes d’investigación n’historia del arte. Tamién destacó l’usu de fontes documentales orixinales, munches d’elles inédites, y una curiada selección bibliográfica que refuerza’l rigor científico de la obra.
Nesta edición, allegaron distintes investigaciones sobre etapes y aspectos de la historia recién y el patrimoniu d’Asturies. Ente les temes qu’afronten figuren l’arquitectura industrial, la evolución de la sociedá asturiana a empiezos del sieglu XX y les creencies populares.
El Premiu Juan Uría Ríu algama anguaño’l so 43.er edición como reconocencia al llabor de los que dediquen el so trabayu a estudiar la historia y el patrimoniu cultural d’Asturies. El galardón lleva’l nome del historiador asturianu Juan Uría Ríu y forma parte de les iniciatives de la conseyería destinaes a favorecer la investigación y l’espardimientu de la conocencia.
Detrás de cada investigación hai años de busca n’archivos, estudiu de documentos y nueves preguntes sobre’l nuestru pasáu. Trabayos como los reconocíos nesta edición dexen recuperar información, abrir nueves llinies d’estudiu y entender meyor cómo se construyó l’Asturies que conocemos.
