Patti Smith convierte Xixón nun alcuentru ente rock, poesía y memoria

Xixón vivió ayeri una cita señalada na trayectoria de Patti Smith. La cantante, poeta y escritora estadounidense volvió atopase col públicu asturianu nel Teatru Xovellanos, onde ufiertó’l conciertu ‘50 años después’, una actuación que coincidió col aniversariu del so primer recital n’España, celebráu’l 20 d’ochobre de 1976 en Badalona. La cita, cola que l’artista conmemora cinco décades de rellación col públicu del estáu español, forma parte de la programación cultural de los Premios Princesa d’Asturies, que-y concedieron esti añu’l galardón de les Artes.

El recital empezó con ‘Dancing Barefoot’, una de les composiciones más reconocíes de ‘Wave’, y siguió con un repertoriu d’once temes nel que Smith repasó distintes etapes de la so carrera. Acompañada por Tony Shanahan, Jesse Smith, Jackson Smith y Seb Rochford, integrantes del Patti Smith Quartet, la artista combinó la fuerza del rock cola presencia de la poesía y les referencies culturales que marcaron la so obra.

‘Redondo Beach’, ‘Ghost Dance’, ‘Nine’, ‘The Crystal Ship’, ‘Break It Up’, ‘Fireflies’ y ‘Pissing in a River’ fueron dalgunes de les canciones que sonaron nel Xovellanos. La interpretación de ‘Because the Night’, compuesta xunto a Bruce Springsteen y convertida nun ésitu internacional, animó al públicu, que s’alzó de los sos asientos pa cantar y baillar. La recta final llegó con ‘Peaceable Kingdom’ y ‘People Have the Power’, ún de los himnos más conocíos de l’artista, que convirtió’l teatru nuna voz colectiva.

La actuación nun se llendó a la revisión musical. Smith incorporó homenaxes y referencies a figures fundamentales del so universu creativu, como’l poeta francés Arthur Rimbaud, el escritor Federico García Lorca y el músicu Jim Morrison. La presencia d’estos nomes volvió amosar la conexón ente música y lliteratura que caracteriza’l trabayu de la estadounidense dende los sos primeros años na escena neoyorquina de los setenta.

La fecha tenía, amás, un significáu especial pa la cantante. El 20 d’ochobre de 1976, Smith actuara nel pabellón del Club Joventut de Badalona ante unes 5.000 persones pa presentar ‘Radio Ethiopia’, el so segundu álbum. La prensa de la dómina destacó la importancia d’aquella actuación nun momentu nel que’l rock internacional empezaba a abrir nuevos caminos n’España, tres la muerte de Franco. Cincuenta años depués, la artista volvió recordar aquella visita y la figura del promotor Gay Mercader, responsable de llevala al estáu.

La programación inclúi una segunda actuación n’Asturies prevista pa esti miércoles nel Palaciu de Deportes de La Guía, en Xixón, tres el treslláu del conciertu que diba celebrase inicialmente na Fábrica d’Armes de La Vega, n’Uviéu, poles previsiones meteorolóxiques. La nueva cita amplía la presencia de Smith na ciudá mientres la selmana de los galardones.