Medio Rural vuelve autorizar les feries y concentraciones de ganáu bovinu a partir del 1 de payares

El Gobiernu d’Asturies va autorizar dende’l 1 de payares la celebración de feries, concursos, certames, puyes, mercaos y cualquier otru eventu qu’implique la concentración de ganáu bovinu. La midida, que se va publicar mañana nel Boletín Oficial del Principáu (Bopa), respuende a la evolución favorable de la dermatosis nodular contaxosa (DNC) y va tar vixente hasta’l 31 d’avientu.

L’autorización lléndase a animales procedentes d’esplotaciones allugaes n’Asturies que permanecieren de forma siguida na comunidá enantes del 1 de xunu del 2026. Tamién van poder participar reses nacíos na comunidá dende esa fecha, siempre que permanecieren nella ensin interrupción. En dambos casos, los animales nun van poder salir d’Asturies dempués del 1 de xunu.

La flexibilización tien en cuenta la evolución epidemiolóxica de la enfermedá, la vacunación nes zones afectaes y la reducción estacional de l’actividá de los insectos vectores. Los eventos con otres especies van siguir suxetos a la so normativa específica.

Pela so parte, el Mercáu Nacional de Ganaos de La Pola Siero va siguir ensin autorización como alcuentru estatal hasta’l 31 d’avientu. Sicasí, les sos instalaciones van poder utilizase pa l’agrupación, xestión, espedición y concentración de bovinos, siempre que los animales cumplan los mesmos requisitos de procedencia y permanencia que’l restu de les concentraciones autorizaes.

Cuarentena

Les esplotaciones que reciban animales procedentes de zones consideraes de riesgu tendrán de caltener n’aislamientu y cuarentena mientres 21 díes a tolos animales d’especies sensibles. Tamién va ser obligatoria la desinsectación de los reses y de los vehículos que les tresporten.

Los vehículos de tresporte de ganáu qu’entren n’Asturies dende otra comunidá tendrán de cumplir les obligaciones de llimpieza, desinfección y desinsectación establecíes. Los servicios veterinarios oficiales, en collaboración coles fuerces y cuerpos de seguridá del Estáu, van xixilar el so cumplimientu.

La conseyería encamienta llindar les visites a les esplotaciones, evitar compartir personal, maquinaria y equipos ente instalaciones y protexer al ganáu frente a insectos como mosquitos, tabanes y cachiparros.

Los plazos van poder modificase en función de la evolución epidemiolóxica, coles mires de recuperar progresivamente l’actividá ganadera y caltener les garantíes necesaries pa protexer la cabana asturiana.