Dir al conteníu
Cultura 3 min de llectura

Dibúxame una pallabra, de Luz de Gas Teatro, gana’l X Premio “Nel Amaro” de teatru n’asturianu

Por Xixón al Día
CompartirWhatsappBlueskyFacebook

La compañía Luz de Gas Teatro ganó’l X Premiu “Nel Amaro” de teatru profesional n’asturianu col espectáculu Dibúxame una pallabra. El xuráu d’esti gallardón impulsáu pola Conseyería de Cultura, Política Llingüística y Deporte destacó d’esta obra «la so eficacia dramática, el dominiu de los recursos escénicos y l’habilidá cola que s’incorporen el teatru d’oxetos, la illuminación, les proyecciones o la música pa treslladar con notable eficacia al espectador a un contestu inspiráu n’Afganistán».

De la mesma manera, el xuráu valoró «el calter poéticu, tienru y delicáu d’un testu dramáticu que tresmite un mensaxe reivindicativu y esperanzador basáu na fuercia de la imaxinación y el poder de les pallabres ensin perder la capacidá de denuncia de la desigualdá».

Dibúxame una pallabra, de Luz de Gas Teatro, cuenta la historia d’Aisha, una neña que nun puede dir a la escuela y qu’alcuentra nel dibuxu una manera de comunicase. Cola ayuda del so amigu Nabid va intentar aprender a lleer y escribir en secreto. El derechu a la educación, la resiliencia y la creatividá tresversen un montaxe que, na so versión en castellanu, yá recibiera los premios ¡OH! al meyor espectáculu pa la infancia y a la meyor autoría, amás del Premiu FETEN 2026 al meyor espectáculu de compromisu social.

Dibúxame una pallabra llegó a la final del Nel Amaro xunto a les producciones caLORCAlor (Guayominí Producciones), Riquete’l del Copete (Higiénico Papel Teatro) y Arde la viesca (Elektrafiktion). Estos espectáculos representáronse a lo llargo del mes d’ochobre nel Teatru Filarmónica d’Uviéu, nel festival de teatru que lleva’l mesmu nome que’l premiu.

Diez años de teatru profesional n’asturianu

El Premiu y Festival Nel Amaro nació en 2017 con una vocación doble: favorecer la creación profesional nes llingües propies d’Asturies y facer que les obres candidates llegaren al escenariu y al públicu. Dende entós, el certame axuntó propuestes bien distintes, siempre col asturianu y l’eonaviegu como llingües de creación teatral. Puen concurrir compañíes profesionales con obres yá estrenaes, tanto orixinales como traducíes dende otres llingües.

El certame recuerda col so nome al escritor y dramaturgu turonés Nel Amaro (1946-2011), una figura fundamental na renovación del teatru asturianu y na so apertura a llinguaxes escénicos contemporáneos. Diez ediciones depués, el festival caltién vivu esi legáu llevando l’asturianu al escenariu y, sobre manera, poniéndolu en contactu col públicu al traviés de nueves histories, nueves compañíes y xeneraciones nueves.

Rellacionao