98 díes de confinamientu resumíos en 50 semeyes. La plaza Mayor acueye hasta’l mes d’agostu una colección de fotografíes feches por vecinos de Xixón que recueyen la vida mientres el confinamientu. Los aplausos, la soledá, los primeros paseos… La vida detúvose nes cais el pasáu 15 de marzu, pero siguió nos llares balcones y terraces. Una realidá que quedó retratada pa siempres nes 395 instantánees participantes na convocatoria de PHotoESPAÑA p’amosar les meyores semeyes que se realizaron en redol a los nuesos balcones.
Mientres la inauguración, l’alcaldesa, Ana González, destacó como «un gran aciertu de PHotoESPAÑA alvertir la singularidá d’esa situación y el pervalible documentu visual» a partir de «una invitación a que los confinaos afilaren el güeyu, enfocaren los sos cámares y dieren rienda suelta a la so creatividá pa captar les situaciones y momentos más singulares d’estos meses estraordinarios».
Pa la rexidora gionesa, esta colección de fotografíes compon un retablu d’imaxes que tomen tolos xéneros, dese la semeya al paisaxe o’l bodegón. «Componen una combinación estraordinariamente humana de semeyes d’una situación que vivimos con proximidá mutua a pesar del encierre». L’amuesa va poder esfrutase hasta finales del mes d’agostu nos balcones de la plaza Mayor.
