Héroes ensin nome ta acabante d’anunciar en toles redes sociales qu’entama cola campaña de crowdfunding pa poder facer posible la so segunda temporada, na que prometen interesantes entrevistes, debates, charres y programes esclusivos.
Al traviés de les diferentes recompenses de la campaña, los organizadores d’esti podcast cultural de sello independiente ufierten camisetes diseñaes pol artista Elduayen Radikal Art, posibilidá d’entrugar a los entrevistaos, posibilidá d’asistir a les grabaciones de los programes y delles xeres más, que recueyen na so plataforma de Verkami https://vkm.is/heroesensinnome
Pero, amás d’esta campaña, el programa va tar patrocináu por tres importantes marques asturianes: Puru Remangu, una marca de ropa que puxa por averar a la sociedá el feminismu y la identidá asturiana al traviés de les sos prendes; musicasturiana.com, la plataforma dixital que fai posible que la musica n’asturianu pueda difundise y Páramo Bar, un chigre de barriu onde se pueden prebar toles novedaes de Cerveza Caleya y delles cerveces más.
Héroes ensin nome ñaz nel añu 2020 dientro de les ondes de la Radio de la Universidá d’Uviéu col oxetivu de promover y d’esparder propuestes y proyeutos culturales que surden n’Asturies al traviés de pequeños podcasts al rodiu de 30 minutos onde s’analiza y se debate colos autores de los proyeutos con entrugues tanto formales como informales. Col recrudecimientu del andanciu a finales d’esi añu, el programa abandona’l recintu universitariu pa realizase de manera independiente, contando cola so primer temporada, realizada ente ochobre de 2020 y xunu de 2021 con 21 programes.
