El presupuestu destináu a Turismu en 2023 va ser el más altu de la hestoria, con una crecedera del 136%, según esplicó la conseyera de Cultura, Política Llingüística y Turismu, Berta Piñán, na presentación de les cuentes del so departamentu na Xunta Xeneral. En total, los fondos pa esti departamentu crecen hasta los 85,6 millones, un 22,8% más qu’esti exerciciu.
La Viceconseyería de Turismu va cuntar con 30 millones, a los que se van sumar otros 26,6 nos primeros meses de 2023, procedentes de los fondos europeos Next Generation. Esti apueste atayante pol sector va dexar encetar la so modernización y tresformamientu, con una inversión de 16,2 millones, financiada íntegramente polos fondos europeos.
Asina, l’anteproyectu recueye, ente otres acciones, un plan de rutes de senderismo y cicloturismo, con una inversión de 2,1 millones, y meyores d’accesibilidá y eficiencia nel Camín de Santiago por 1,3 millones. L’ampliación del Muséu de Belles Artes tamién se va financiar con fondos europeos (905.370 euros) y va destinase un millón a la promoción del turismu industrial. Otros 800.000 euros van dedicar a la dixitalización d’oficines d’información turística.
Como novedá, les cuentes incorporen dos nueves llinies de sovenciones pa sofitar obres de meyora n’eficiencia enerxética de los agospiamientos turísticos (6,3 millones) y p’ayudar a los conceyos a faer más eficientes y sostenibles los albergues públicos del Camín de Santiago. La llegada de l’AVE a Asturies va llevar apareyada una campaña promocional, dotada con un millón, y van destinase 820.000 euros a la proyección del Camín de Santiago.
Por sectores creativos
La conseyera sorrayó l’esfuerzu por “consolidar el cambéu na política cultural, qu’agora s’enfoca de manera más afayadiza a les necesidaes de cada sector y que, amás, refuerza’l papel de les instituciones culturales na vida d’Asturies.” Asina, el presupuestu destináu a Cultura algama los 32,9 millones, un 44 % más qu’al entamu de la llexislatura, y plantega diverses actuaciones y un sistema d’ayudes acomodaes a la realidá de cada ámbitu creativu.
En materia escénica, prevese una inversión de 1,3 millones qu’inclúi novedaes como la creación de la Rede Teatros d’Asturies (50.000 euros) y la puesta en marcha d’una amuesa d’artes escéniques y otres disciplines (100.000 euros). Les artes visuales van cuntar con 3,9 millones, qu’inclúin les aportaciones a los grandes centros como’l Muséu de Belles Artes, Llaboral Centru d’Arte, Centru Niemeyer y Muséu Barjola. Coles mesmes, caltiense’l fondu de 70.000 euros pa que’l Belles Artes pueda adquirir nueva obra.
La dotación destinada a la música asturiana, escluyida la tresferencia a la Orquesta Sinfónica del Principáu (OSPA), va algamar los 1,4 millones y recueye aportaciones nominatives de sofitu a la Ópera d’Uviéu (200.000 euros) y al coru Llión d’Oru. El sector del llibru va cuntar con 438.000 euros.
Equipamientos y patrimoniu
Cabo destacar la creación d’una llinia d’ayudes a festivales culturales (250.000 euros) y el sofitu a la construcción de nuevos equipamientos como’l Centru Cultural de Grau (450.000 euros), la Casa de la Música de Candás (1,4 millones) o la Casa Frasinelli en Corao. Igualmente, destínase una partida al proyectu Al Faru, consistente na conversión del singular faru de Tapia de Casariego nun centru de residencies artístiques, que se va llevar a cabu en collaboración cola Autoridá Portuaria d’Avilés.
El programa de Patrimoniu Cultural esperimenta una medría del 12,7%, hasta llegar a los 6.446.582 euros. Les actuaciones nel Prerrománicu asturianu van llevase 500.000 euros y va rematar la reforma integral del edificiu d’accesu a Pedrete Bustillo (143.000 euros). Coles mesmes, van invertise 300.000 euros n’anovar la esposición permanente dedicada al Prerrománicu nel Muséu Arqueolóxicu d’Asturies. Pela so parte, el plan de la cultura castreña va cuntar con 255.000 euros pa caltenimientu y pa dar continuidá a les escavaciones empecipiaes anguaño en seis castros. Amás, va poner en marcha l’atles virtual de la cultura castreña asturiana.
En materia de Política Llingüística, los fondos destinaos a la promoción del asturianu xuben a 2,5 millones, una cantidá que representa un 48,4% más qu’al entamu del mandatu. El próximu añu van realizase importantes meyores nel traductor Eslema.2 p’avanzar escontra una plataforma de traducción corporativa dende los dispositivos móviles.
Destaca tamién la medría de l’aportación a la Universidá d’Uviéu pa contribuyir a la puesta en marcha de la Cátedra María Xosefa Canellada, dedicada a los estudios asturianistes. Al traviés de la Rede de Normalización Llingüística siguirá sofitándose a los conceyos y va sofitase la puesta en marcha dos nuevos servicios de normalización en Cabrales y na Mancomunidá del Valle del Nalón.
Pela so parte, la Dirección Xeneral de Deporte va encarar inversiones destacaes, como la meyora integral del refuxu de Brañagallones, pal que s’acuten 200.000 euros, a los que se van sumar 900.000 más procedentes de los fondos de Transición Xusta. Igualmente, van acometese reformes nes instalaciones del Narancu, n’Uviéu (300.000 euros), nel polideportivu Juan Carlos Beiro (210.000 euros) y nel complexu deportivu de Pénxamo (200.000 euros), dambos en Llangréu.
El Plan Social del Deporte, financiáu con fondos del Plan de Recuperación, Tresformamientu y Resiliencia, va dexar invertir 628.000 euros na compra de material afechu, ayudes a clubes y federaciones pa la organización d’eventos n’igualdá y na puesta en marcha de campañes de sensibilización.
