Dempués d’inscribise más de 170 persones, del Congresu Fundacional cellebráu’l 6 de payares y de la constitución el pasáu 22 d’avientu de la primer Agrupación Llocal nel Nalón, Aína sigue abriendo camín. El nuevu partíu políticu asturianista y d’izquierdes va celebrar esti miércoles 4 una asamblea abierta p’afitar l’Agrupación Llocal de Xixón. La cita va ser a les siete la tarde nel Centru Municipal Integráu del barriu L’Arena y nella van tratase delles problemátiques ya inquietúes qu’afecten al conceyu. Nel actu pue participar tamién xente que tovía nun s’inscribió a Aína.
Cola constitución d’esta agrupación llocal, Aína continúa la campaña #AbrimosCamín. Con ella ta activando les primeres organizaciones municipales, qu’axunten a persones qu’aporten dende trenta conceyos de toa Asturies. D’esti mou, el partíu busca consolidar l’afiliación de les inscrites, aportar a más xente y entamar el so trabayu políticu dende la cercanía, pa dar respuesta a les necesidaes de parroquies, barrios y conceyos.
Precisamente, el conceptu de cercanía ye ún de los pegoyos principales d’esti partíu asturianista nuevu que tien ente los sos oxetivos asturianizar la política; señalar y poner igua a les desigualdaes sociales n’Asturies; ufrir una alternativa pa qu’Asturies algame les mayores cotes d’autogobiernu a nivel políticu, económicu y sociocultural y rexenerar la política asturiana.
Dempués de la bona receptividá cola puesta en marcha de l’Agrupación Llocal del Nalón, Aína llama a una trentena persones a participar n’actividá de Xixón. Asina, el partíu sigue avanzando pa construyir pasín a pasu un movimientu asturianista modernu, cercanu, realista y con un firme compromisu cola xusticia social, con una economía qu’afite futuru n’Asturies, col feminismu, col territoriu, colos servicios públicos, cola democracia participativa, colos derechos humanos, col internacionalismu y cola cultura.
