La Conseyería de Presidencia y 40 Principales Asturies convoquen una nueva edición del Concursu de Maquetes Pop-Rock del programa Culturaquí dirixida a grupos musicales o solistes asturianos menores de 35 años. Los trabayos podrán presentase hasta’l 15 de setiembre.
La normativa esixe que los participantes nun editaren o autoeditaren, hasta la fecha de la convocatoria, un máximu de dolce tarrezas n’unu o dellos soportes y que nun tengan vixente contratu dalgunu con compañíes discográfiques.
Para participar ye necesariu rellenar un boletín d’inscripción y una declaración responsable y presentar una maqueta en CD, con un mínimu de seis temes. Tamién ye precisu apurrir el currículum del solista o grupu, nesti últimu casu xunto cola relación nominal de componentes y los preseos que toquen; les lletres de los cantares y fotografíes.
El grupu ganador va escoyese nun conciertu que se va celebrar n’ochobre. El premiu va consistir en 6.000 euros en metálicu que se van destinar a la grabación d’un CD (300 exemplares) o un EP (150 exemplares) y a la edición d’un vídeu, a lo menos. La banda galardonada va ufiertar un conciertu de presentación del discu y otros trés recitales promocionales a lo llargo de 2024.
El Concursu de Maquetes Pop-Rock algama anguaño la so 27ª edición. Hasta agora, participaron nel certame más de 800 grupos que superaron los 200 conciertos. El balance inclúi tamién 58 discos editaos y cientos d’hores de programación y promoción en 40 Principales Asturies y Cadena Dial.
