Adrián Barbón llama a «rebaxar la tensión» y recuperar el respetu pol adversariu nel alderique públicu

Adrián Barbón llamó güei a “rebaxar la tensión” y recuperar el respetu pol adversariu nel alderique públicu, “tal qu’ocurre n’Uruguai”. “Tenemos qu’empezar a usar esi modelu. Puen caltenese alderiques mui intensos, pero siempre dende’l respetu”, sorrayó.

Barbón ufiertó esta mañana delles entrevistes a medios de comunicación autonómicos y nacionales por cuenta de la entrega de los Premios Princesa d’Asturies 2026. Nesi marcu, recordó’l so recién viaxe a Arxentina y Uruguai, onde foi testigu de dos formes diferentes de facer política. “Encantaríame que la política española se paeciera muncho más al alderique públicu n’Uruguai qu’al alderique públicu n’Arxentina”, valoró.

Nesti sen, censuró los insultos del presidente arxentín, Javier Milei, contra’l presidente d’España, Pedro Sánchez: “Esperaba una condena atayante, porque seyamos d’izquierdes o de dereches, el presidente del Gobiernu d’España ye una institución y nun pue aceptase como normal que’l xefe d’un Estáu estranxeru venga a faltalo. Eso ye anómalu y hai que condergalo, como cualquier violencia política”.

“Yo nun concibo la política como espaciu pal insultu”, señaló, de la que consideró “llamentable” l’usu de la intelixencia artificial pa crear vídeos “qu’intenten engañar a la xente”, en referencia al material audiovisual publicáu ayeri nes redes del Partíu Popular.

Tamién sollertó de que nes próximes elecciones xenerales del 29 de payares va escoyese “ente una sociedá caritatible y comunitaria y una sociedá individualista ya insolidaria”. “Esi ye l’alderique”, amestó.

En relación coles declaraciones del expresidente Felipe González, quien aseguró que nos próximos comicios va votar en blancu, Barbón reconoció que llamenta escuchar eses manifestaciones d’un hestóricu dirixente socialista que, nel so momentu, sufrió una campaña de desprestixu. “Llamento que daquién que careció eso diga que va votar en blancu. Nun puedo dicir otra cosa”, precisó.