El presidente d’Asturies, Adrián Barbón, recibió esti miércoles a Xuan Xosé Sánchez Vicente, Xosé Lluís García Arias y Lluís Xabel Álvarez, fundadores del colectivu Conceyu Bable, al que se va rindir tributu na 45 Selmana de Les Lletres Asturianes. Fíxolo nun cuartu simbólicu dientro del edificiu de Presidencia del Gobiernu, nel despachu del históricu dirixente asturianu Belarmino Tomás. Al alcuentru tamién acudió Vanessa Gutiérrez, conseyera de Cultura, Política Llingüística y Deporte.
El presidente destacó enantes del actu la importancia de Conceyu Bable p’afondar na autoestima d’Asturies y la creación de símbolos identitarios que, hasta entós, nun se teníen, como por casu la bandera o l’himnu. «Pa nós ye un placerr recibilos y reivindicar una vegada más que, frente al pesimismu, ilusión siempres, y que, frente a les crisis d’identidá, arguyu de pertenencia, d’identidá asturiana y d’asturianía». destacó. «La mayor herencia que nos dexó Conceyu Bable foi la conciencia d’Asturies, l’autoestima y l’arguyu d’identidá», quixo rematar.
Los trés representantes de lo que fuera Conceyu Bable afondaron na hestoria asturiana y los finxos que se marcaron dende l’asociación pal desenvolvimientu de l’Asturies que conocemos anguaño no que cinca a identidá y a movimientos de reivindicación, siendo García Arias el más críticu, refugando ser subsidiarios del centralismu de Madrid.
