L’Agrupación Llocal d’Aína en Xixón amuesa’l so “esmolecimientu y enfadu” cola decisión anunciada ayeri pol Ministeriu de Tresportes y Movilidá Sostenible en rellación al Vial de Xove. Dende’l partíu asturianista critiquen que “se pasa d’un modelu soterráu a un plan B que dixebra Xove con una autopista de cuatro carriles, creando otru focu de contaminación atmosférica y acústica, cuando la salida natural d’El Musel ye’l túnel d’Aboñu”.
“Esta obra nació muerta pol sobrecoste y agora yá podemos calificar de chambonada lo que supón sacala alantre”, cuestionen dende la formación política. D’esta manera Aína llama a sofitar les movilizaciones del vecindariu de la zona oeste de Xixón -la primera d’elles esti xueves a les 16.30h na entrada d’El Musel, pel vial de Xove-, y pide al Ayuntamientu y al Principáu una respuesta contundente.
Amás los asturianistes planteguen qu’esta decisión “amuesa una vegada más el ningunéu que los distintos gobiernos españoles exercen sobre Asturies”. “Necesitamos tener una voz propia y pesu políticu en Madrid que defenda los intereses del pueblu asturianu penriba de too”, sorrayen dende Aína Xixón. Por último, califiquen de “migayes” les alternatives que’l Ministeriu de Tresporte plantega pa “compensar la so incompetencia” y esixen que se dea respuesta a la parálisis que sufre la ciudá en proyectos dependientes del gobiernu español como esti Vial de Xove, el Plan de Víes, el Solarón o’l Metrotrén.
