El 28 de marzu de 2011 zarraba la estación de trenes d’El Humedal. Xixón despidía una estación céntrica y la estación provisional de Sanz Crespo asumía les comunicaciones ferroviaries. «12 años dempués sigue la provisionalidá, los milenta metros cuadraos del Solarón son un espaciu infrautilizáu nel centru la ciudá y Gijón Al Norte S.A -la sociedá pública creada pa dar una solución a la cuestión de les víes acumula pérdides añu tres d’añu y tien una deuda de 43 millones qu’empufa a la ciudadanía», critica Aína.
La nueva formación asturianista ta acabante d’asoleyar una infografía nes sos redes sociales fecha en base a información publicada por medios de comunicación. Nella critiquen dalgunes de les consecuencies del zarru de la estación d’El Humedal como la baxada de xente qu’usa les cercaníes dende que tán en Sanz Crespo -un 33% menos nestos 12 años- o que los terrenos del Solarón lleven tou esti tiempu paraos, a la espera d’una operación inmobiliaria nuna ciudá que pierde población y con alredor 15.000 viviendes vacíes.
Mui sangrín ye’l casu de Gijón al Norte S.A, sociedá participada pol Conceyu, Principáu, Fomentu, Renfe y ADIF y que dende’l 2002 xestiona la cuestión ferroviaria xixonesa. En 21 años nun resolvió, empeoró la situación y amás presenta unes cuentes alarmantes: debe 43 millones de préstamos que recibió de Fomentu, Principáu y Ayuntamientu y nos dos últimos años perdió 996.635 €. Too ye más llamativu si se tien en cuenta qu’esta sociedá namás tien tres trabayadores qu’en 2022 supunxeron un coste de 241.247 €.
Propuestes d’Aína
El partíu asturianista considera que nestos doce años sucediéronse les siegles polítiques nes distintes alministraciones, pero non les soluciones. Por eso Aína afonda nesta cuestión y defende potenciar les cercaníes -porque vertebren el territoriu, son menos contaminantes y yá hai una infraestructura creada que pue dar muncho más de sí-; tener una estación más accesible -con una meyor conexón col centru y los barrios a traviés de llinies d’autobús, d’un serviciu llanzadera, de la rede municipal de bicis…-; dar una solución al Solarón -que los milenta metros cuadraos abandonaos sean útiles pa les necesidaes de la ciudá y non pa la especulación inmobiliaria-; y esixir responsabilidaes a Gijón al Norte, porque nun pue ser qu’acumule pérdides millonaries y hipoteque a la ciudá ensin dar nenguna solución a esta cuestión.
Con esta campaña entama’l so llabor l’Agrupación Llocal d’Aína en Xixón, formación política que nació dafechu’l pasáu 25 de febreru dempués de celebrar una I Asamblea Nacional na que decidieron nun presentase a les elecciones de mayu pa poder centrase en facer política con posu, seriedá y constancia.
