Aníbal González Rodríguez, col poemariu Anatomía d´un farfagón; Nuria Barranco, coles narraciones breves Muerdo; ya Ivana Castañón Vázquez, col testu teatral Tiempos de penuria, resultaron ganadores de los premios Asturias Xoven de Poesía, Narrativa y Testos Teatrales 2021, convocaos pola Conseyería de Presidencia.

Cada autor va recibir 50 exemplares de les obres, que van publicase dientro de la Colección Texu, que  nesta ocasión alcanza les 76 ediciones, lo que la convierte nuna importante muestra de la lliteratura xoven asturiana y reúne llibros de tolos premiaos. La recopilación inclúi trabayos de dalgunos de los meyores escritores de la última xeneración como José Luis Piquero, Martín López Vega, Jordi Doce, Ricardo Menéndez Salmón, Ignacio del Valle, Pablo Rodríguez Medina, Ismael Piñera, Chus Fernández, Jon Bilbao, Sofía Castañón, Miguel Barrero, David Barreiro, Rodrigo Olay y José Ángel Gayol, ente otros.

Aníbal González Rodríguez (Moreda d´Ayer, 1991) estudió realización audiovisual y filosofía. Escribío ensayos en castellanu, poesía en castellanu y asturianu y tamién dalgún cuentu. Participó nel concursu de microrrellatos Entaina 2021 y dellos de los sos poemes tán publicaos en Formientu Dixital.

Nuria Barranco Flores (Madrid, 1989) ye licenciada en Filoloxía Hispánica y doctora n’Estudios Humanísticos pola Universidá d’Uviéu, con una tesis sobre estratexes pragmátiques d’orientación de la interpretación nos testos periodísticos informativos. Trabayó en dellos institutos como profesora de Llingua Castellana y Lliteratura. Anguaño, imparte esta materia nel IES Astures de Lugones. Muerdo ye’l so primer llibru de rellatos.

Ivana Castañón Vázquez (Castrillón, 1995) ye graduada en Filosofía y Sociología y máster en Estudios de la Ciencia, la Tecnoloxía y la Innovación y en Formación del Profesoráu. Recibió dellos premios, ente los que destaquen el Astragal, contra la violencia sexista, y el Nuevos Realizadores contra la violencia de género 2019. Próximamente, va esponer na Sala Borrón 2022, dentro del Programa de Xóvenes Artistes del Principáu d’Asturies.