La Xunta de Gobiernu, celebrada’l martes 19 de xineru, aprobó 229 nueves ayudes correspondientes al programa de reactivación económica ‘Xixón Reinicia’, por un total de 345.469’41 euros.
Ye la séptima fola de sovenciones na que se destinen 317.929’99 euros del total a la recuperación de trabayadores anguaño n’ERTE de 135 negocios. Concédense tamién ayudes pa gastos de reapertura a 97 llocales que permanecieron pesllaos de resultes del COVID-19 por valor de 27.539’42 euros.
El Gobiernu municipal va siguir tramitando estes ayudes, a les que se ta dando la máxima prioridá, pa que toes tean tramitaes a finales del mes de febreru. Yá son más de 1.200 les persones autónomes y negocios de la ciudá beneficiaos con estes ayudes dotaes con 5 millones d’euros que tienen como oxetivu reactivar l’actividá económica y la reapertura de negocios y establecimientos, según favorecer el caltenimientu de les contrataciones llaborales rellacionaes con empreses y persones trabayadores que se vieron afectaos pol decretu d’estáu d’alarma.
Coles mesmes, soscribióse un conveniu enmarcáu nel Plan d’Empléu de collaboración públicu-privada impulsáu pol Conceyu de Xixón, dientro del proyectu Asistente de Ventes Omnicanal’ de la Unión de Comerciantes, que la so sovención total xube a 165.370 euros. La empresa beneficiaria va contratar a tiempu completu mientres un añu, tres una primer fase de formación, a un alumnu o alumna del cursu, na categoría profesional d’Ayudante de Dependiente/a. La contratación cunta con una sovención de 12.797’82 euros.
A lo último, tornóse el recursu reposición interpuestu pola empresa Lumo Arquitectos S.L.P. frente al alcuerdu robláu en Xunta de Gobiernu’l 20 d’ochobre de 2020 nel que s’esixía, con calter solidariu, la subsanación de los defectos reparaos na obra d’ampliación del centru tecnolóxicu. Los argumentos presentaos pola empresa nun se consideren abondes para desvirtuar les conclusiones del informe pericial.
