La decimoctava edición del Premiu Alfonso Iglesias n’asturianu, convocáu pola Conseyería de Cultura, Política Llingüística y Deporte, recayó na autora xixonesa Arantza Margolles Beran (1982) pol so cómic Slečno. La obra inspírase nel diariu de viaxe d’una muyer asturiana con raíces en Moravia que se tresllada a Olomouc p’aprender el checu y asina averase al pasáu de la so familia.
El xuráu d’esta edición tuvo compuestu pol filólogu Marcos Martínez, la ilustradora Mónica García y l’escritor Agustín Cernuda del Río, ganador de la última convocatoria. Nel acta, les sos integrantes destacaron “la orixinalidá y la coherencia de la propuesta gráfica, asina como la espresividá cola que se constrúi una historia personal que s’entemez cola memoria histórica familiar y social”. Margolles articula un rellatu de fuerte carga emocional con una reflexón sobre la identidá y la memoria.
El Premiu Alfonso Iglesias, promovíu pola Conseyería de Cultura, Política Llingüística y Deporte, ta dotáu con 6.000 euros y inclúi la publicación de la obra ganadora. A la convocatoria podíen presentase trabayos inéditos, non premiaos n’otros certames, de temática y estilu llibres, yá fuera en forma d’historia única o de conxuntu de rellatos, con una estensión mínima de cincuenta páxines.
Arantza Margolles Beran ye llicenciada n’Historia pola Universidá d’Uviéu y cunta con estudios de posgrau pola Universidá Autónoma de Madrid. Collaboró en diversos medios de comunicación asturianos y ye responsable de la sección d’efemérides del diariu El Comercio. Coles mesmes, presentó’l programa Histories y Misterios na RTPA y ye codirectora del periódicu A quemarropa, vinculáu a la Selmana Negra de Xixón. En llingua asturiana, ye autora de Fuimos granos d’arena. La solidaridá n’Asturies énte’l desastre d’Annual (2004) y de la novela histórica Santu Amaro, obra cola que llogró’l Premiu Muyer d’Ediciones Trabe nel 2025.
