Asturies va allugar mañana y pasáu la xunta del Conseyu de Patrimoniu Históricu Español. Esti órganu, que preside’l Ministeriu de Cultura y qu’axunta dacuando a toles comunidaes y ciudaes autónomes, constitúyese como’l principal foru de coordinación y cooperación institucional en materia de patrimoniu cultural.
La conseyera de Cultura, Política Llingüística y Deporte, Vanessa Gutiérrez, va inaugurar mañana en Llaboral Ciudá de la Cultura, en Xixón, la 96ª sesión d’esti órganu xunto cola directora xeneral de Patrimoniu Cultural y Belles Artes del Ministeriu de Cultura, Ángeles Albert de León.
A lo llargo de dos xornaes, van afrontase cuestiones estratéxiques al rodiu de la xestión, salvaguarda y proyección internacional del patrimoniu cultural, con especial atención a los bienes d’interés cultural, la protección del patrimoniu inmaterial y subacuáticu, y les nueves ferramientes tecnolóxiques aplicaes a la conocencia y caltenimientu del patrimoniu.
L’alcuentru tamién va incluyir una axenda de visites a espacios relevantes del patrimoniu cultural y arqueolóxico d’Asturies, como’l castru de la Campa Torres (Xixón), el Muséu de la Sidra (Nava) o la ilesia prerrománica de San Salvador de Priesca (Villaviciosa), declarada Patrimoniu Mundial. La xunta va rematar el vienres, 9 de mayu, con una visita a les termes romanes de Campo Valdés, nel centru históricu de Xixón.
