Asturies algamó en mayu dos fitos pal mercáu llaboral: el paru baxó de les 50.000 persones y l’afiliación a la Seguridá Social asitióse a les puertes de les 400.000 cotizantes. L’ameyoramientu foi xeneralizáu, con un comportamientu especialmente positivu nos servicios y la industria. Amás, estos datos consoliden los meyores rexistros de paru y emplegu pa un mes de mayu en casi dos décades.
El presidente del Principáu, Adrián Barbón, afitárase como oxetivu superar anguaño esi doble llistón psicolóxicu: menos de 50.000 persones en desemplegu y más de 400.000 con trabayu, datos que nun s’algamaben dende la crisis financiera (la gran recesión). L’añu pasáu, Asturies consiguió amenorgar el desemplegu a 49.725 persones en xunu. El mayor rexistru d’afiliaciones llogróse nel mes d’agostu, con 399.453 ocupaos.
Los númberos conocíos güei dexen prever que los datos del 2026 seyan bastante meyores. Polo normal, tanto’l paru como l’afiliación tienen una evolución positiva mientres xunu y xunetu. Si la evolución sigue esti enclín, Asturies va averase a les sos marques históriques. El menor númberu de persones en paru rexistráu n’Asturies foi de 44.911 en xunetu del 2007. Tocantes a les afiliaciones, subieron a 411.452 n’agostu del 2008.
Conforme a los númberos de mayu, el desemplegu asítiase en 49.320 persones, tres baxar en 1.160 al respective d’abril, mientres que l’afiliación algama les 399.421, con 2.791 más que’l mes anterior. El datu del paru ye’l meyor pa un mes de mayu dende 2007, mientres que l’afiliación marca’l so nivel más altu pa esti períodu dende 2008.
En comparanza con mayu del 2019, la comunidá cunta agora con 20.877 paraos menos y 32.500 afiliaos más. En términos interañales, el desemplegu baxó en 2.425 persones, lo que supón una cayida del 4,69% al respective de mayu del 2025. Coles mesmes, l’afiliación aumentó en 8.035 ocupaos, con una medría del 2,05%. D’esta miente, Asturies encadena 62 meses consecutivos de descensu interañal del paru y crecedera de l’afiliación.
La evolución mensual del desemplegu foi positiva nel mercáu llaboral en términos xenerales, con descensos en tolos ámbitos económicos, tolos grupos d’edá y dambos sexos. Por sectores, la mayor baxada en mayu rexistróse nos servicios, con 970 paraos menos, siguíos pola industria (105), la construcción (64), y el colectivu de persones ensin emplegu anterior (8).
En comparanza col restu del país, Asturies rexistró en mayu un comportamientu especialmente positivu tocantes a la evolución del paru. La cayida mensual autonómica, del 2,3%, superó la media estatal, del 1,54%. Coles mesmes, l’afiliación a la Seguridá Social volvió crecer nel Principáu, en llinia cola evolución favorable del emplegu a escala nacional.
Nel detalle por sectores d’actividá, l’afiliación avanzó en mayu especialmente na hostelería, que sumó 556 cotizantes, siguida pola industria manufacturera (420), les actividaes alministratives y servicios auxiliares (326) y les actividaes sanitaries y de servicios sociales (302). Tamién rexistraron aumentos destacaos el comerciu (269 afiliaos más), l’Alministración pública (209), la construcción (176) y el tresporte y almacenamientu (172). Estes cifres reflexen la meyora del emplegu nos principales ámbitos d’actividá de la economía asturiana.
